Salim Kutta Case: बडगुजरांची भेट कुठे झाली? सलीम कुत्ताला नाशिक पोलिस घेणार फैलावर

Salim Kutta Case : ठाकरे गटाचे नाशिक महानगर प्रमुख सुधाकर बडगुजर यांचे मुंबई बॉम्बस्फोटातील आरोपी सलीम कुत्ता सोबतचा व्हिडिओ व्हायरल होत आहे. बडगुजर प्रकरणात नाशिक पोलिसांचा तपास प्रगती पथावर आहे.

बडगुजरांची दोन दिवसापासून चौकशी सुरु असून आज (रविवारी) सलग तिसऱ्या दिवशीही पोलिस त्यांची कसून चौकशी करीत आहेत. चौकशीत मोठी अपडेट समोर येत आहे.बडगुजर-सलीम कुत्ता यांच्या भेटीचा अधिक तपशील पोलिसांना हवा आहे. त्यासाठी पत्रव्यवहार करण्यात आला आहे.

नाशिक पोलिसांच्या गुन्हे शाखेचे एक पथक पुणे येथील येरवडा कारागृहात जाऊन सलीम कुत्ता याचा घेणार जबाब असल्याची माहिती समोर आली आहे. सुधाकर बडगुजर प्रकरणी नाशिक पोलिसांचा नाशिक मध्यवर्ती कारागृहासोबत पत्र व्यवहार केला आहे.

मुंबई बॉम्बस्फोटातील आरोपी सलीम कुत्ता याच्यासमवेत पार्टीमध्ये नाचतानाच्या व्हिडिओसंदर्भात ठाकरे गटाचे नाशिक महानगर प्रमुख सुधाकर बडगुजर यांची तिसऱ्या दिवशी चौकशी सुरु आहे. बडगुजर यांच्याकडून समाधानकारक उत्तरे मिळत नसल्याने त्यांना पुन्हा चौकशीसाठी बोलविण्यात आले आहे. चौकशी पूर्ण झाल्यावर अहवाल सरकारकडे पाठविणार असल्याची सूत्रांची माहिती आहे.

कुख्यात दाऊद इब्राहिमचा साथीदार सलीम कुत्ता याच्याबरोबर शिवसेना ठाकरे गटाचे नाशिक महानगरप्रमुख सुधाकर बडगुजर यांनी केलेल्या पार्टीच्या चित्रफिती शिवसेना शिंदे गटाने उघड केल्यानंतर या पार्टीची एसआयटीमार्फत चौकशी करण्याचे नागपूर अधिवेशनात जाहीर करण्यात आले. त्यामुळे सुधाकर बडगुजर हे नाव सर्वांच्या तोंडी आले आहे.