Kishor Patil On Sanjay Raut : संजय राऊत उद्धव ठाकरेंची दिशाभूल करतात; कशी... ते किशोर पाटलांनी सांगितलं

Jalgaon News : शिवसेना फुटल्यानंतर ठाकरे गटाचे खासदार संजय राऊतांनी शिंदे गटातील सर्व आमदार-खासदारांचा वेळोवेळी खरपूस समाचार घेताना दिसत आहेत. मात्र राऊतांमुळेच शिवसेना फुटली आणि माजी मुख्यमंत्री उद्धव ठाकरेंवर सत्ता सोडण्याची वेळ आल्याचेही शिंदे गटाकडून पलटवार केला जात आहे.

कुठेही न फिरता एका जागी बसून राऊत ठाकरेंची 'चॉकलेट' दाखवून दिशाभूल करतात, असा खोचक टोला पाचोराचे आमदार किशोर पाटलांनी लगावला आहे. राऊत आणि ठाकरेंवर केलेल्या बोचऱ्या टीकेमुळे ठाकरे गटाकडूनही पाटालांना प्रत्युत्तर मिळण्याची शक्यता आहे. (Latest Political News)

खासदार राऊतांनी २०१९ मध्येच मुख्यमंत्रीपद एकनाथ शिंदे यांना देण्यात येणार होते, मात्र भाजपने विरोध केल्याचे सांगितले होते. यावर आमदार पाटील म्हणाले, "खासदार संजय राऊतांमुळेच सर्व बट्टयाबोळ झाला आहे. ते एका कॅबीनमध्ये बसतात उध्दव ठाकरेंना पंतप्रधान करून टाकतात. तेवढ्याच एका चॉकलेटवर उध्दव ठाकरेही राहतात हेच खरे दुर्दैव आहे. "

"राऊत कधीही दालनाच्या बाहेर पडत नाही, त्यांना मुंबईच्या पलीकडे ग्रामीण महाराष्ट्रच माहिती नाही. अजूनही त्यांना राज्यात कुठे काय चालले आहे हेच माहिती नाही. ठाकरेच्या आजूबाजूला चार डोकी आहेत ते त्यांना कधी मुख्यमंत्री करतात, तर कधी पंतप्रधान करतात. त्यांच्या भोवतीची ही चार डोकी त्यांची फसवणूक करीत आहेत. पक्षाची फसवणूक करतात", असाही टोला पाटलांनी राऊतांसह ठकारेंना लगावला आहे.

ग्रामीण नेता पुढे येवू दिला नाही

शिवसेना ठाकरे गटाच्या नेत्यावर टीका करताना पाटील म्हणाले, "माझा अनुभव असा की मुंबईतील या नेत्यांनी कधीही ग्रामीण नेतृत्वच पुढे येवू दिलेले नाही. या मुंबईच्या नेत्यांना मुंबईपलीकडे महाराष्ट्रच माहीत नाही. आजपर्यंत दाखवा की शिवसेनेच्या मुंबईतील नेत्याशिवाय ग्रामीण महाराष्ट्रातील एक नेता उदयास आला आणि तो ग्रामीण महाराष्ट्राची भूमिका मांडतोय, असे कुठेतरी ऐकले का? असा एक तरी नेता दाखवा शिवसेनेने ग्रामीण महाराष्ट्रातील नेता वर येवू दिला. ग्रामीण महाराष्ट्रातील नेता वरती जात असलेला दिसला की थांबविला ही परिस्थिती शिवसेना ठाकरे गटात आजही दिसून येते", असल्याच्या आरोपही आमदार किशोर पाटील यांनी केला.

(Edited by Sunil Dhumal)