Seema Hiray : भाजप आमदार सीमा हिरे यांना समर्थकांनी केले 'भावी मंत्री'

Seema Hiray News : भारतीय जनता पक्षाच्या शहरातील आमदार सीमा हिरे यांचा आज वाढदिवस आहे. या निमित्ताने शहरभर समर्थकांनी फ्लेक्स झळकवले आहेत. या फ्लेक्सची वेगळ्याच कारणाने चर्चा होत आहे.

आमदार सीमा हिरे यांना वाढदिवसाच्या शुभेच्छा देण्यासाठी लावलेल्या काही फ्लेक्स वर त्यांचा 'भावी मंत्री', असा उल्लेख करण्यात आला आहे. त्यामुळे हे फ्लेक्स आणि आमदार हिरे यांचा वाढदिवस चर्चेचा विषय ठरला आहे. मंत्रिपदासाठी सुरू असलेले लाॅबिंग देखील चर्चेत आहे.

राज्याच्या मंत्रिमंडळाचा विस्तार किंवा होणार याबाबत सातत्याने वावड्या उठविल्या जात आहेत. मंत्रिमंडळ विस्ताराला नेमका मुहूर्त केव्हा लागणार हे निश्चित नाही. मात्र नाशिक (Nashik) शहरातील आमदार सीमा हिरे यांचा देखील मंत्रिमंडळ विस्तारात समावेश होईल असे प्रयत्न आहेत. आमदार हिरे यांचा आज वाढदिवस आहे. आगामी निवडणुकीच्या पार्श्वभूमीवर तो धुमधडाक्यात साजरा होत आहे. अनेक समर्थकांनी त्यांना शुभेच्छा देण्यासाठी शहरभर फ्लेक्स झळकवले आहेत.

भारतीय जनता पक्षाचे (BJP) शहरातील तीन व जिल्ह्यात दोन, असे पाच आमदार आहेत. यामध्ये डॉ. राहुल आहेर, आमदार सीमा हिरे आणि आमदार देवयानी फरांदे हे तिघेही विस्तारात समावेश व्हावा म्हणून प्रयत्नशील आहेत. त्यासाठी समर्थक आणि पदाधिकाऱ्यांकडून वरिष्ठांकडे जोरदार लॉबिंग देखील सुरू आहे. हे लाॅबिंग किती फळाला येते याकडे लक्ष लागले आहे.

त्यामुळे मंत्रिमंडळ विस्तार होईल की नाही, यापेक्षाही झालाच तर मंत्री कोण? हा नाशिकच्या राजकारणाच्या दृष्टीने महत्त्वाचा विषय आहे. आमदार हिरे यांच्या वाढदिवसानिमित्त लागलेल्या फ्लेक्समुळे तो पुन्हा चर्चेत आला. लोकसभा निवडणुकीमुळे नाशिकची बरीच राजकीय गणितं बदलली आहेत. विधानसभा निवडणुकीपूर्वी नाशिकमधील राजकीय गणित भाजप कोणत्या दिशेने नेणार अशी चर्चा रंगली आहे.