Nashik Trimbakeshwar Kumbh Mela : केंद्र सरकारचे आभार.. ! उशीरा का होईना पण कुंभमेळ्याला सहकार्य करण्याची दिली 'ग्वाही'

Nashik Kumbh Mela 2027 | प्रयागराज येथील कुंभमेळा पार पडल्यानंतर आता पुढचा सिंहस्थ कुंभमेळा २०२६-२७ मध्ये नाशिक-त्र्यंबकेश्वर येथे होत आहे. अवघ्या दोन वर्षांवर कुंभमेळा येऊन ठेपला आहे. असे असताना कुंभमेळ्यासाठी निव्वळ बैठकांवर बैठका घेतल्या जात आहेत. मात्र ठोस निर्णय होत नसल्याने कामांना कधी सुरुवात करायची असा प्रश्न प्रशासनासमोर निर्माण झाला आहे.

असे असताना उशीरा का होईना पण केंद्र सरकारने कुंभमेळ्यासाठी पूर्ण सहकार्य लाभेल अशी ग्वाही दिल्याची माहिती सूत्रांकडून कळते आहे. त्यामुळे नाशिककरांच्या आशा आता पल्लवित झाल्या आहेत.

नाशिक-त्र्यंबकेश्वर कुंभमेळ्याच्या अनुषंगाने विविध कामे प्रस्तावित आहेत. या कामांना गती देण्याची आवश्यकता आहे. त्यापार्श्वभूमीवर शुक्रवारी (दि. १८) पीएमओ कार्यालयाने आढावा घेतला. पंतप्रधानांचे सल्लागार तरुण कपूर यांनी शुक्रवारी ऑनलाइन दूरदृश्यप्रणाली द्वारे महापालिकेने कुंभमेळ्यासाठी केलेल्या पंधरा हजार कोटींच्या विकास आराखड्याची माहिती घेतली.

एकीकडे राज्य सरकारकडून कुंभमेळ्याची जोरात तयारी सुरु असताना केंद्र सरकारकडून मात्र कुंभमेळ्यासंदर्भात कोणतीही भूमिका स्पष्ट करण्यात आली नव्हती. त्यामुळे निधीच्या उभारणीसंदर्भातही मोठे कोडे राज्य सरकारला पडले होते.

मात्र शुक्रवारी झालेल्या आढावा बैठकीत कुंभमेळ्यासाठी आवश्यक असलेल्या महामार्ग, सांडपाणी प्रक्रिया प्रकल्प, मल्टिमॉडेल हब यांसारख्या प्रकल्पांच्या उभारणीसाठी केंद्र सरकारचे पूर्ण सहकार्य असेल अशी ग्वाही देण्यात आली आहे. तसेच संबधित विभागांनी या प्रकल्पांचा केंद्रीय योजनांमध्ये समावेश करुन त्याचे प्रस्ताव सादर करावेत असे निर्देश पीएमओ कार्यालयाचे सचिव तरुण कपूर यांनी राज्याला दिल्याची माहिती सूत्रांनी दिली.

व्हीसीद्वारे झालेल्या या बैठकीत विभागीय आयुक्त प्रवीण गेडाम, महापालिका आयुक्त मनीषा खत्री यांनी सचिव तरुण कपूर यांच्यापुढे आराखडा सादरीकरण केलं. राज्याच्या मुख्य सचिव सुजाता सौनिक, जिल्हाधिकारी जलज शर्मा यांच्यासह राज्य पातळीवरील विविध विभागांचे सचिव यावेळी उपस्थित होते.

परंतु बैठकीत केवळ पंतप्रधान यांचे सल्लागार तरुण कपूर यांच्याकडून केवळ आराखड्याची माहिती घेण्यात आली आहे. मात्र काही ठोस किंवा महत्वपूर्ण निर्णय घेण्यात आलेला नाही. प्रयागराजमधील कुंभमेळ्याला ज्याप्रकारे सहकार्य करण्यात आले, त्याचप्रमाणे नाशिकमधील कुंभमेळ्यालाही केंद्र सरकारकडून सहकार्य लाभेल अशी अपेक्षा नाशिककरांची आहे. त्यादृष्टीने केंद्र सरकारने या बैठकीत काहीतरी ठोस निर्णय घेऊन निधी संदर्भातील साशंकता दूर करणे अपेक्षित होते अशी चर्चा आहे.