Suhas Kande News: राज्यातील नगरपालिका निवडणुका जाहीर झाल्या आहेत. सत्तेत असलेल्या महायुतीचे पक्ष एकत्र की स्वतंत्र हा निर्णय अधांतरीच आहे. परस्परांविरुद्ध लढलेल्या नेत्यांची भूमिका काय याची उत्सुकता कायम आहे.
नांदगाव आणि मनमाड या दोन प्रतिष्ठेच्या आणि राजकीय दृष्ट्या जागरूक पालिका आहेत. शिवसेना शिंदे पक्षाचे आमदार सुहास कांदे यांचा दोन्ही नगरपालिकांवर अंमल आहे. ही सत्ता कायम ठेवण्यासाठी निवडणुकीआधीच आमदार सुहास कांदे यांनी फिल्डिंग लावली आहे.
आमदार कांदे आणि ज्येष्ठ मंत्री छगन भुजबळ यांच्यातील राजकीय वाद सर्वश्रुत आहे. हे दोघेही महायुतीचे घटक आहेत. मात्र त्यांच्यातून विस्तवही जात नाही. या स्थितीत नवी राजकीय समीकरणे काय असतील? याची उत्सुकता आहे.
विधानसभा निवडणुकीत राष्ट्रवादी काँग्रेस अजित पवार आणि शिवसेना शिंदे हे दोन्ही पक्ष महायुतीचे घटक होते. मात्र माजी खासदार समीर भुजबळ यांनी अपक्ष उमेदवारी करीत आमदार कांदे यांना आव्हान दिले होते. त्यामुळे महायुतीच्या तंबूत कांदे आणि भुजबळ यांचे राजकीय उंट एकत्र येणे सध्या तरी अशक्य दिसते आहे.
नगरपालिका निवडणुकीत देखील महायुती असली तरीही या दोन्ही नेत्यांचे समर्थक सहजासहजी एकत्र येण्याची शक्यता नाही. मनमाड आणि नांदगाव या दोन्ही नगरपालिकेत सध्या कांदे यांची सत्ता आहे. या नगरपालिका हातातून गेल्यास थेट विधानसभा निवडणुकीवर त्याचा परिणाम होऊ शकतो.
विधानसभा निवडणुकीतच आमदार कांदे यांना विरोध करणारे अनिल आहेर, संजय पवार आणि राजेंद्र देशमुख या तिन्ही आमदारांना कांदे यांनी आपल्या आपल्याकडे घेतले. जगन्नाथ धात्रक हे एकमेव माजी आमदार विरोधात आहे. त्यांची भूमिका मात्र सतत डळमळीत राहिली आहे.
मंत्री छगन भुजबळ यांना मानणारा मोठा वर्ग नांदगाव मतदार संघात आहे. माजी आमदार पंकज भुजबळ यांनी दोन टर्म या मतदारसंघाचे नेतृत्व केले आहे. त्यामुळे नैसर्गिक राजकारण म्हणून कांदे विरोधकांना भुजबळ यांचाच आधार आहे.
विधानसभा निवडणुकीनंतर नांदगावच्या राजकारणात बऱ्याच घडामोडी घडल्या आहेत. अनेकांना सत्तेची फळे चाखली. अनेक विरोधकांना या सत्तेचा त्रास देखील भोगावा लागला. त्यामुळेच एक नव्या दमाची टीम घेऊन मंत्री भुजबळ नगरपालिकेच्या निवडणुकीत आमदार कांदे यांना आव्हान देणार का? याची उत्सुकता आहे.
-------
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.