Prakash Ambedkar : राजकारणात होणार उलथापालथ? प्रकाश आंबेडकर आज मोठी घोषणा करणार

Pune : विधानसभा निवडणुकीसाठी सर्वच पक्षांनी जोरदार तयारी सुरू केलेली असताना वंचित बहुजन आघाडीही कामाला लागली आहे. या घडामोडी घडत असतानाच आघाडीचे प्रमुख प्रकाश आंबेडकर आज (ता. 16) मोठी घोषणा करणार आहेत. ही घोषणा महाराष्ट्राच्या राजकारणात उलथापालथ घडवून आणणार का, अशी चर्चा यानिमित्ताने सुरू झाली आहे.

मागील काही दिवसांपासून राज्यात तिसऱ्या आघाडीची चर्चा सुरू झाली आहे. या आघाडीचे नेतृत्व प्रकाश आंबडेकर यांच्याकडे असेल, असेही सांगितले जात आहे. त्यांना प्रहार संघटनेचे बच्चू कडू, मराठा आरक्षणासाठी झटणारे मनोज जरांगे, काही ओबीसी, मुस्लिम समाजातील नेते व संघटना साथ देणार असल्याचीही चर्चा आहे.

औरंगाबादमध्ये आंबेडकरांची दुपारी चार वाजता पत्रकार परिषद होणार आहे. याचवेळी ते मोठी घोषणा करण्याची शक्यता आहे. त्यांनी एक्सवर याबाबत पोस्ट करून संपूर्ण महाराष्ट्राची उत्सुकता वाढवली आहे. या घोषणेकडे महाविकास आघाडीसह महायुतीचेही लक्ष राहणार आहे.

लोकसभा निवडणुकीत वंचितने महाविकास आघाडीला साथ न देता स्वतंत्रपणे निवडणूक लढवली. पण त्यांना अपेक्षित यश मिळाले नाही. वंचितचा आघाडीला फटका बसेल, अशी चर्चा होती. पण ती फोल ठरली. याउलट आघाडीने दमदार कामगिरी करत महायुतीला लोळवलं. वंचितचा प्रभाव यावेळी फारसा दिसून आला नाही.

निवडणुकीनंतर आंबेडकरांकडून सातत्याने आघाडीवर टीका केली जात आहे. भाजप आणि काँग्रेस एकाच नाण्याच्या दोन बाजू असल्याचा निशाणा ते साधत आहेत. शेतकरी कामगार पक्षाचे नेते जयंत पाटील यांच्या विधान परिषद निवडणुकीतील पराभवानंतरही आंबेडकरांनी काँग्रेसला लक्ष्य केले होते.

विधानसभा निवडणुकीत आंबेडकर महायुतीसह आघाडीलाही टक्कर देणार असल्याचे जवळपास स्पष्ट झाले आहे. आता ते कुणाला सोबत घेणार, तिसऱ्या आघाडीचे बिगुल वाजणार का, असे अनेक प्रश्न उपस्थित झाले आहेत. त्याचे उत्तर आजच्या पत्रकार परिषदेत आंबेडकर देतील, अशी शक्यता आहे.