Ashish Deshmukh News : नेते, हायकमांड पटोलेंना गांभीर्याने घेत नव्हते, आता कार्यकर्तेही ऐकत नाहीत; देशमुखांचा टोला

Mumbai : काँग्रेसचे प्रदेशाध्यक्ष नाना पटोले यांच्यासमोरच नागपुरात काँग्रेसच्या बैठकीत पदाधिकाऱ्यांमध्ये हाणामारी झाली. पटोलेंनी पदाधिकाऱ्यांना समजून सांगण्याचा प्रयत्न केला, पण त्यांचे न ऐकता पदाधिकारी एकमेकांना भिडले. पटोलेंच्या समोरच पदाधिकारी त्यांचे ऐकत नाहीत, यावरून भाजपचे नेते आशिष देशमुख यांनी पटोलेंना चिमटा घेतला आहे.

"नेते आणि हायकमांड पटोलेंना आजपर्यंत गांभीर्याने घेत नव्हते, आता एखादा लहानसा कार्यकर्तादेखील नाना पटोले यांना गांभीर्याने घेत नाही. काँग्रेसचे कार्यकर्ते त्यांचे ऐकत नाहीत. त्यामुळे त्यांच्याबाबत न बोललेले बरं," असे देशमुख म्हणाले.

मराठा समाज आरक्षणावर देशमुख म्हणाले, "देवेंद्र फडणवीस मुख्यमंत्री असताना मराठा समाजाला आरक्षण दिले होते. उद्धव ठाकरे, शरद पवार यांचे सरकार आल्यावर ते हे आरक्षण टिकवू शकले नाही. ठाकरे सरकारने आरक्षणाची बाजू न्यायालयात योग्य मांडली नाही. त्यामुळे आरक्षण गमवावे लागले. मात्र, आता एकनाथ शिंदे यांचे सरकार मराठा समाजाला टिकावू आरक्षण देईल. त्यात ओबीसी समाजाचा कुठेही टक्का कमी होणार नाही," असे देशमुख म्हणाले.

मराठा समाजाला आरक्षण मिळावे, यासाठी सर्वच पक्ष ठाम आहेत. ओबीसींचा टक्का कमी न होता मराठा आरक्षण मिळावे, यासाठी सरकार प्रयत्न करीत आहे. मनोज जरांगे पाटलांनी सावधपणे विधाने करावेत, असा सल्ला देशमुखांनी त्यांना दिला.