Congress Politics : काँग्रेस प्रमुख पदाधिकाऱ्यांनी आळवला सूर; नाना पटोले हटाव काँग्रेस बचाव

Nagpur News : विधानसभेच्या निवडणुकीत काँग्रेसचा दारुण पराभव झाला. तो कशामुळे आणि कोणामुळे झाला याकरिता चिंतन शिबिर नागपूरमध्ये घेण्यात येणार आहे.

तत्पूर्वी या संदर्भात झालेल्या प्राथमिक बैठकीत सर्वांचा रोष प्रदेशाध्यक्ष नाना पटोले यांच्यावर होता. त्यामुळे शिबिराच्या माध्यमातून नाना पटोले यांना प्रदेशाध्यक्ष पदावरून हटवण्याची मागणी प्रामुख्याने केली जाणार असल्याचे समजते.

लोकसभेच्या निवडणुकीपासूनच नाना पटोले (Nana Patole) यांच्या कार्यशैलीच्या विरोधात अनेकांनी तक्रारी केल्या होत्या. त्यांना हटवण्याची मागणीसुद्धा केली होती. नागपूर येथे काँग्रेसच्या अधिवेशनानंतर दिल्लीतून आलेल्या अनेक बड्या नेत्यांकडे तक्रारी केल्या होत्या. मात्र राहूल गांधी यांनी कोणाचेच ऐकले नाही. त्यांच्यावर विश्वास टाकला. लोकसभेच्या निवडणुकीत मोठे यश मिळाल्याने नाना पटोले यांची बाजू अधिक भक्कम झाली होती.

आता मात्र विधानसभेच्या निवडणुकीच्या निकालानंतर नाना पटोले एकटे उघडे पडले. काँग्रेसचे अवघे 16 आमदार निवडून आलेत. त्यामुळे त्यांना हटवण्याची मागणीने पुन्हा जोर धरला आहे. निवडणुकीच्या निकालानंतर नाना पटोले प्रदेशाध्यक्षपदाचा राजीनामा देणार अशी चर्चा होती. मात्र अद्याप त्यांनी राजीनामा दिला नाही. निकालानंत मुंबईत झालेल्या पराभूत उमेदवारांच्या बैठकीत मध्य नागपूरचे काँग्रेसचे (Congress) उमेदवार आणि युवक काँग्रेसचे राष्ट्रीय महासचिव बंटी शेळके यांनी नाना पटोले राष्ट्रीय स्वयंसेवक संघाचे एजंट म्हणून काम करीत असल्याचा त्यांनी आरोप केला.

आपल्याला काँग्रेसने उमेदवारी दिली होती. असे असताना पटोले यांनी एकाही पदाधिकाऱ्याला प्रचारासाठी पाठवले नाही. भाजपचच्या नेत्यांसोबत साटेलोटे केले. राष्ट्रीय स्वंयसेवक संघाच्या मुख्यालयातून निवडूण आल्यास आपले स्टेटस वाढेल अशी भीती त्यांना वाटत होती. याच कारणामुळे अप्रत्यक्षपणे पटोले यांनी भाजपला मदत केल्याचा दावा बंटी शेळके यांनी केला आहे.

तत्पूर्वी आज नागपूरच्या कॉफी हाऊसमध्ये प्रमुख कार्यकर्त्यांची बैठक घेण्यात आली. या बैठकीमध्ये विधानसभा निवडणुकीमध्ये झालेल्या पराभवावर विस्तृत चर्चा व या पराभवाकरिता कोण-कोण जबाबदार यावर चिंतन करण्यासाठी शिबिर नागपूर येथे घेण्याचे ठरले. शिबिराची रुपरेषा ठरवण्यासाठी बुधवारी चार डिसेंबरला प्रमुख नेत्यांची एक बैठक घेण्यात येणार आहे. आज झालेल्या बैठकीत महाराष्ट्र प्रदेश काँग्रेसचे सचिव आर. एम. खान नायडू व कमलेश समर्थ याव्यतिरिक्त इकराम हुसेन, मनोज बागडे, रमण पैगवार, मोईन काझी, चंदू वाकोडीकर, संजय कडू, शादाब खान व वीरेंद्रसिंग ठाकूर उपस्थित होते.