Chandrashekhar Bawankule : महायुतीचे परफेक्शन बदलेल असे बोलू नका; बावनकुळेंनी दिला इशारा

Bjp News : आगामी काळात होत असलेल्या विधानसभा निवडणुकीची तयारी सर्वच पक्षाने सुरु केली आहे. भाजपने सर्वत्र आढावा बैठक आयोजित करून आघाडी घेतली आहे. महायुती मजबूत आणि एकत्र आहे. महायुतीतील सर्वच नेत्यांनी मीडियासमोर आणि सार्वजनिक ठिकाणी व्यक्तिगत स्वरूपाने बोलू नये, अशा सूचना सर्वांना दिल्या आहेत. तरीही कोणी बोलल्यास त्यावर विचार करू, असा इशारा भाजपचे प्रदेशाध्यक्ष चंद्रशेखर बावनकुळे यांनी दिला आहे.

काही लोकांना मीडियासमोर बोलण्याची सवय आहे. त्यामुळे महायुतीचे परफेक्शन बदलंत आहे. सर्वच पक्षांनी काळजी घ्या, एकमेकांबद्दल बोलू नये आणि वाईट विधान करू नये, असे आवाहन चंद्रशेखर बावनकुळे (Chandrashekhar Bawankule) यांनी केले आहे.

किरीट सोमय्या आमचे नेते आहेत, ते नाराज नाहीत. केंद्रीय आणि राज्य निवडणूक आयोगात त्यांनी मतदार यादीचं सुसूत्रीकरण करण्यावर काम सुरु केले आहे. मला वाटतं त्यांना आणखी जबाबदारी द्यावी. मात्र, त्यांनी नकार देत माझ्याकडे आधीच काम असल्याचे म्हटले आहे. त्यामुळे ते नाराज नाहीत, असे भाजपचे (Bjp) प्रदेशाध्यक्ष चंद्रशेखर बावनकुळे यांनी स्पष्ट केले.

काँग्रेस नेते मलिकार्जुन खरगे यांचा राजीनामा मागत आहोत. राहुल गांधींनी अमेरिकेत केलेल्या विधानावर अद्यापही मल्लिकार्जुन यांनी प्रतिक्रिया दिली नाही. राहुल गांधींच्या भूमिकेवर ते राजीनामा देतील असं वाटलं, मात्र अजूनही त्यांचा राजीनामा नाही. त्यामुळे खरगे यांनी राजीनामा द्यावा, अशी मागणी त्यांनी केली.

याआधी अपघात प्रकरणात दोनदा बोललोय, त्यामुळं पुन्हा बोलणं योग्य नाही, असे म्हणत याविषयी बोलणं टाळले. पश्चिम विदर्भातल्या अकोला, बुलढाणा आणि वाशिम या तीन जिल्ह्यात आढावा बैठक घेण्यात येणार आहे. कार्यकर्त्यांनी पदाधिकाऱ्यांची बैठकीत संवाद साधण्यात येणार आहे.

महायुती आगामी विधानसभा निवडणुकीत 51 टक्के मत घेऊन विजयी होईल, यासाठी ही बैठक आणि नियोजन असणार आहे. या बैठकीत आज अकोल्यातल्या पाचही मतदारसंघाचा आढावा घेणार असल्याचे बावनकुळे यांनी स्पष्ट केले.