Dr. Parinay Fuke : कमजोर उमेदवाराशी लढण्यात परिणय फुकेंना नाही स्वारस्य !

Dr. Parinay Fuke : भंडारा-गोंदिया लोकसभा मतदारसंघातून लोकसभा निवडणूक लढण्यास भाजपचे माजी मंत्री डॉ. परिणय फुके यांनी नकार दिला आहे. काँग्रेस प्रदेशाध्यक्ष नाना पटोले यांनी निवडणूक लढण्यास नकार दिल्याने आपणासदेखील लढण्याचे स्वारस्य राहिलेले नाही, असे म्हणत डॉ. फुके यांनी भाजपकडून आपली दावेदारी मागे घेतली आहे.

या संदर्भात डॉ. फुके यांनी सांगितले की, भंडारा-गोंदिया लोकसभा मतदारसंघातून भाजपकडून मी निवडणूक लढावी, अशी कार्यकर्त्यांची इच्छा होती. त्यापूर्वी मी काँग्रेसचे प्रदेशाध्यक्ष नाना पटोले यांना आव्हान दिले होते. पण त्यांनी हे आव्हान न स्वीकारता निवडणूक लढण्यास नकार दिल्याने मलादेखील आता स्वारस्य राहिलेले नाही. त्यामुळे मला निवडणूक लढायची नाही, असे मी पक्षातील वरिष्ठांना कळविले. या मतदारसंघातून पक्ष ज्या उमेदवाराला उमेदवारी देईल, त्याला बहुमताने निवडून आणण्याची जबाबदारी आपली आहे, असेदेखील डॉ. फुके यांनी सांगितले.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

माजी मंत्री डॉ. परिणय फुके हे उपमुख्यमंत्री तथा भाजपचे दिग्गज नेते देवेंद्र फडणवीस यांच्या निकटवर्तीयांपैकी एक आहेत. काँग्रेसचे प्रदेशाध्यक्ष आमदार नाना पटोले हे निवडणूक रिंगणात असते तर पटोले विरुद्ध फुके हा सामना खूपच चुरशीचा ठरला असता, असे अनेक जाणकारांचे मत आहे. परंतु पटोले हे मैदानात उतरलेच नाहीत. त्यामुळे मनासारखा प्रतिस्पर्धीच न मिळाल्याने फुके यांनीदेखील उमेदवारीसाठी अनावश्यक जोर लावला नाही, असे सांगण्यात येत आहे. फुके हे राज्य मंत्रिमंडळात मंत्री होते. आपल्या कार्यकाळात त्यांनी भंडारा-गोंदिया जिल्ह्यात बरीच कामे केली आहेत. त्याचा फायदा भाजपला लोकसभा निवडणुकीत नक्कीच होणार असल्याचे चित्र आहे.

..तर मजा आली असती !

निवडणूक मैदानात टक्कर देणारा उमेदवार समोर असला तर लढण्यातही मजा येते. काँग्रेसचे प्रदेशाध्यक्ष नाना पटोले यांना मी भंडारा-गोंदिया लोकसभा मतदारसंघात लढण्याचे आव्हान दिले होते. ते स्वीकारून पटोले मैदानात उतरले असते, तर मजा आली असती. पण आता तगडा उमेदवार नसल्यामुळे लढण्यात स्वारस्य राहिले नसल्याचे डॉ. परिणय फुके यांनी सांगितले.

Edited By : Atul Mehere

R