Nagpur Politics : ब्रिजेश दिक्षीत 'ठाकरेंच्या' रडारवर; नितीन गडकरी यांच्या प्रकल्पाला मोठा धक्का

Nagpur News, 04 Jul : केंद्रीय मंत्री नितीन गडकरी यांचे कट्टर विरोधक आणि नागपूर पश्चिमचे काँग्रेस आमदार विकास ठाकरे पुन्हा आमने-सामने आले आहेत. दाभा येथील कृषी विद्यापीठाच्या जागेवर विकसित केले जात असलेले कृषी प्रदर्शन ठाकरे यांच्या रडारवर आले आहे.

महाराष्ट्र स्टेट इन्फ्रास्ट्रक्चर डेव्हलपमेंट कॉर्पोरेशनचे अध्यक्ष ब्रिजेश दीक्षित यांच्या नेतृत्वात हा प्रकल्प विकसित केला जात आहे. त्यांनी त्यांच्या खास मर्जीतील एनसीसी लिमिटेड या कंपनीला कंत्राट दिले आहे. ठाकरे यांचा प्रमुख रोष दीक्षित आणि एनसीसी या कंपनीवर आहे. या प्रकल्पाच्या विरोधात ठाकरे यांनी अनेक तक्रारी केल्या आहेत. विधानसभेतही हा विषय उपस्थित केला आहे. ठाकरेंच्या आरोपांमुळे नितीन गडकरी यांच्या प्रकल्पाला धक्का लागत आहे.

दीक्षित रेल्वेतून सेवानिवृत्त झाल्यानंतर नागपूर मेट्रो रेल्वे कॉर्पोरेशनचे व्यवस्थापकीय संचालक होते. त्यांच्याच नेतृत्वात नागपूर मेट्रो रेल्वे विकसित झाली. मेट्रो रेल्वेच्या कामात प्रचंड भ्रष्टाचार झाला आणि नियमांचे उल्लंघन केले असल्याचा ठाकरे यांचा आरोप आहे. सीएजीने नागपूर मेट्रो रेल्वे प्रकल्पात एक हजार कोटी रुपयांचा घोटाळा झाला असल्याचे म्हटले आहे. त्या प्रकल्पातील बहुतांश कंत्राटे एनसीसी लिमिटेडला टेंडरशिवाय देण्यात आली होती. त्याच दीक्षितांची आता एमएसआयडीच्या अध्यक्षपदी नियुक्ती करण्यात आली आहे.

मेट्रो रेल्वेचेच मॉडेल दीक्षित येथे राबवत आहे. एनसीसी कंपनीलाच पुन्हा येथेही कंत्राट दिले आहे. या सर्व प्रकल्पाची सखोल चौकशी करावी अशी मागणी ठाकरे यांनी सरकारकडे केली आहे. नागपूर येथील पंजाबराव देशमुख कृषी विद्यापीठाच्या दाभा येथील जागेवर कृषी प्रदर्शन केंद्र स्थापन करण्याची घोषणा केंद्रीय मंत्री नितीन गडकरी यांनी केली आहे.

या प्रकल्पासाठी राज्य सरकारने 22/ कोटी रुपयांचा निधी मंजूर केला आहे. याच जागेवर मागील दोन वर्षांपासून गडकरी ॲग्रोव्हिजन प्रदर्शन भरवत आहे. ही जागा महसूल विभागाच्या नोंदीमध्ये झुडपी जंगल म्हणून आरक्षित आहे. डॉ. पंजाबराव देशमुख कृषी विद्यापीठाच्या कृषी वानिकी शिक्षण व संशोधनासाठी राखीव आहे. तसेच फुटाळा तलावाच्या जलग्रहण क्षेत्राचा देखील भाग आहे. भारतीय वायुदलाच्या मुख्यालयातील मेंटेनन्स कमांडचे ऑफीससुद्धा शंभर मीटरच्या आता आहे.

ठाकरे यांनी एअर ऑफिसर कमांडिंग-इन-चीफ यांना पत्र पाठवून एमएसआयडीसीने संरक्षण मंत्रालयाच्या मार्गदर्शक तत्त्वांचे उल्लंघन केल्याचेही त्यांनी कळविले आहे. नागपूरच्या विकास आराखड्यानुसार, ही जमीन स्मशानभूमी, सार्वजनिक सेवा, बस डेपो, माध्यमिक शाळा, रस्ता, आणि गोल्फ क्लब, खेळाचे मैदान म्हणून आरक्षित आहे. सरकारने कोणताही अधिकृत बदल अद्याप अधिसूचित केलेला नाही. त्यामुळे येथील बांधकाम बेकायदेशीर असल्याचा आरोप विकास ठाकरे यांनी केला आहे.