Sunil Kedar News : ऐन निवडणुकीच्या धामधुमीत सुनील केदार काँग्रेसला भगदाड पाडूनच शांत बसणार? राजीनामे पदाधिकाऱ्यांच्या खिशात...

Nagpur Congress internal conflict : नागपूर जिल्ह्यातील वाडी नगरपालिकेत काँग्रेसचा एबी फॉर्म शरद पवारांच्या राष्ट्रवादी काँग्रेसच्या उमेदवाराला दिल्याने सुमारे दोनशे कार्यकर्त्यांनी आपले राजीनामे प्रदेशाध्यक्ष हर्षवर्धन सपकाळ यांच्याकडे पाठवले आहेत. याच प्रमाणे काटोल तालुक्यातील कोंढाळी पालिका क्षेत्रातील कार्यकर्त्यांनी राजीनामे देण्याचा इशारा दिला आहे. या सर्वांचा राग काँग्रेसचे नेते व माजी मंत्री सुनील केदार यांच्यावर आहे.

केदार यांनी आपल्याच मनाने तिकिटांचे वाटप केले, प्रामाणिक कार्यकर्त्यांना डावलले आणि भाजपला मदत होईल, असे उमेदवार दिल्याचा आरोप पदाधिकाऱ्यांकडून केला जात आहे. जिल्हाभरातून तक्रारी येत असल्याने केदारांच्या अडचणी वाढण्याची शक्यता आहे. नगरपालिका आणि नगरपरिषदेच्या निवडणुका जाहीर होताच सर्वांचे लक्ष केदार यांच्या भूमिकेकडे लागले होते.

तिकीट वाटप समन्वयाने आणि संमतीने व्हावे, याकरिता काँग्रेसने एक निवड समिती स्थापन केली होती. बाहेरच्या जिल्ह्यातील नेत्याला निवड समितीचे प्रमुख नेमले होते. मात्र केदारांनी निवड समितीला गुंडाळून ठेवले. त्यांच्या अपरोक्ष इच्छुकांच्या मुलाखती घेतल्या. त्याकरिता आपल्याच समर्थकांना बोलावले होते. यावर आक्षेप घेऊन तक्रारी झाल्यानंतर हर्षवर्धन सपकाळ यांनी हा मुलाखती रद्द केल्या होत्या. नव्याने मुलाखती घेण्याचे आदेश दिले होते. त्यानुसार मुलाखती घेण्यात आल्या. मात्र या बैठकीला केदारांचे समर्थकांना दांडी मारली.

दुसऱ्या दिवशी अहवाल आणि इच्छुकांच्या नावाची यादी सादर करण्यात आली. ती शेवटपर्यंत बाहेर आली नाही. केदारांनी जे ठरवले त्यानुसार कुठे आघाडी करण्यात आली तर कुठे स्वबळावर काँग्रेस लढत आहे. उमेदवारही केदारांनीच निश्चित केले. ज्या पालिका क्षेत्रात, तालुक्यात निवडणूक आहे तेथील कार्यकर्त्यांना विचारले नाही. त्यांचे मत घेतले नाही. त्यामुळे असंतोष उफाळून आला आहे.

वाडीच्या कार्यकर्त्यांनी राजीनामे दिले. आता काटोल तालुक्यातील कार्यकर्त्यांनी राजीनाम्याचे अस्त्र उगारले आहे. विशेष म्हणजे गुरुवारी हर्षवर्धन सपकाळ यांनी आपल्याकडे अद्याप कुणाचे राजीनामे आले नाहीत, असे सांगून केदारांची बाजू घेतली असल्याचे दिसून येते.