Sunil Mendhe News: स्वतःचे पगार थांबवा, पण शेतकऱ्यांना त्यांचे पैसे द्या; खासदार सुनील मेंढेंची अधिकाऱ्यांना तंबी

Bhandara News: धान उत्पादक शेतकऱ्यांसाठी खासदार सुनील मेंढे चांगलेच आक्रमक झाले असून त्यांनी पणन विभागाच्या अधिकाऱ्यांना चांगलीच तंबी दिली. शासकीय आधारभूत खरेदी केंद्रावर धान विक्री करणाऱ्या शेतकऱ्यांना उन्हाळी हंगामातील धान चुकारे मागील काही महिन्यांपासून दिले गेले नाहीत.

शेतकऱ्यांची चूक नसताना देखील विनाकारण त्यांची अडवणूक करण्याचा प्रयत्न करू नका, असे सांगत प्रसंगी स्वतःचे पगार थांबवा, पण शेतकऱ्यांना त्यांच्या घामाचे पैसे तातडीने द्या, अशा शब्दात खासदार सुनील मेंढे यांनी अधिकाऱ्यांना खडसावले.

भंडारा जिल्हाधिकारी कार्यालयात गुरुवारी आढावा बैठकीचे आयोजन करण्यात आले होते. या बैठकीत खासदार सुनील मेंढे यांनी विविध विषयांचा आढावा घेतला. पण याच वेळी शासकीय आधारभूत धान खरेदी केंद्रावर धान विक्री करणाऱ्या शेतकऱ्यांच्या पैशाच्या विषयावरून खासदार चांगलेच आक्रमक झाल्याचे पाहायला मिळाले.

धान विक्री करणाऱ्या अनेक शेतकऱ्यांना अजूनही चुकारे देण्यात आले नाहीत. याबाबत वारंवार सूचना देऊनही शेतकऱ्यांना त्यांचा मोबदला दिला जात नसल्यामुळे खासदार सुनील मेंढे यांनी जिल्हा मार्केटिंग अधिकारी आणि पणन विभागाचे प्रबंध संचालक यांना आज चांगलेच धारेवर धरले.

यावेळी बैठकीतून प्रबंध संचालकांना भ्रमणध्वनीवर याबाबत जाब विचारला. शेतकऱ्यांचे पैसे अडविण्याचा अधिकार तुम्हाला कोणी दिला? त्यांची चूक नसताना त्यांचे पैसे थांबवू नका, प्रसंगी स्वतःचे पगार थांबवून शेतकऱ्यांना पैसे द्या, अशा शब्दात खासदारांनी अधिकाऱ्यांची चांगलीच कानउघडणी केली.

जिल्हाधिकाऱ्यांनी या विषयाकडे लक्ष देऊन शेतकऱ्यांचे पैसे लवकरात लवकर कसे देता येतील, याबाबत निर्णय घ्यावा, असे आवाहनही खासदारांनी जिल्हाधिकाऱ्यांना केले. दरम्यान, खासदारांनी फोनद्वारे अधिकाऱ्यांची केलेल्या कानउघडणीनंतर आता तरी शेतकऱ्यांना लवकरात लवकर पैसे मिळणार का, हे पाहणे महत्वाचे असणार आहे.

Edited by Ganesh Thombare