माझे मत कॉंग्रेस समर्थित उमेदवार देशमुख यांनाच : छोटू भोयर

नागपूर : नागपूर विधानपरिषद निवडणुकीसाठी कॉंग्रेसने काल रात्री आपला उमेदवार बदलविला. त्यानंतर विविध चर्चांना पेव फुटले. छोटू भोयर (Chotu Bhoyar) काय भूमिका घेतात, याकडे राजकीय वर्तुळासह सामान्य जनतेचेही लक्ष लागले होते. ‘मी अजूनही कॉंग्रेसमध्येच (Congress) आहे आणि कॉंग्रेस समर्थीत उमेदवार मंगेश देशमुख यांनाच मत देणार असल्याचे डॉ. रवींद्र ऊर्फ छोटू भोयर यांनी ‘सरकारनामा’शी बोलताना सांगितले.

छोटू भोयर म्हणाले, १७ दिवसांपूर्वी मी भारतीय जनता पक्ष (BJP) सोडून कॉंग्रेसमध्ये प्रवेश केला होता, तो केवळ विधानसभेची उमेदवारी मिळावी म्हणून नव्हे, तर भाजपमध्ये माझ्यावर सतत अन्याय झाला म्हणून पक्ष सोडला. कॉंग्रेस नेत्यांनी जल्लोषात माझे स्वागत केले, मला मान सन्मान दिला. मला विधानपरिषदेची उमेदवारी दिली, त्याबद्दल कॉंग्रेस नेत्यांचा मी आभारी आहे. आता कॉंग्रेस सोडून जाण्याचा प्रश्‍नच उद्भवत नाही. मी कॉंग्रेसमध्येच राहून पुढील कार्य करीत राहणार आहे.

आज कॉंग्रेसला जर असे वाटत असेल की, छोटू भोयरला उमेदवारी देऊन कॉंग्रेसचे कार्यकर्ते समाधानी नाहीत. त्यामुळे त्यांनी वेगळा पर्याय निवडला असेल, तर त्याला माझी काहीही हरकत नाही. मी कॉंग्रेसच्या निर्णयाच्या विरोधात जाणार नाही. नेत्यांच्या निर्णयाचं समर्थनच करतो. त्यामुळे भाजप नेत्यांना आनंदी होण्याची काहीच गरज नाही. भाजपमधून कॉंग्रेसमध्ये आलेल्या छोटू भोयर यांना उमेदवारी दिल्यामुळे कॉंग्रेस कार्यकर्ते नाराज आहेत, त्यामुळे उमेदवार बदलला हेच एकमेव कारण असेल, तर मग मंगेश देशमुखसुद्धा कॉंग्रेसचे नाहीत. मग ते कार्यकर्त्यांना कसे चालतील, असे विचारले असता, कदाचित ते पूर्वाश्रमीचे कॉंग्रेस कार्यकर्ता असतील, असे उत्तर भोयर यांनी दिले आणि या विषयावर अधिक बोलण्याचे टाळले.