Nagpur Graduate Election: विधानपरिषदेचे उमेदवार 'कोटीपार' : अभिजीत वंजारी, सुधाकर कोहळेंच उत्पन्न कमालीचं वाढलं; प्रतिज्ञापत्रातून ‘आर्थिक’ चित्र समोर

Nagpur Graduate Election: नागपूर विभाग पदवीधर मतदारसंघाच्या निवडणुकीत उमेदवारी अर्ज दाखल केल्यानंतर प्रतिज्ञापत्रातील आर्थिक माहिती समोर आली आहे. काँग्रेसचे उमेदवार ॲड. अभिजित वंजारी यांच्या वार्षिक उत्पन्नात गेल्या पाच वर्षांत तब्बल एक कोटीची वाढ झाली आहे. भाजपचे उमेदवार सुधाकर कोहळे यांचेही उत्पन्न कोटीच्या पुढे गेले आहे. भाजपचे बंडखोर उमेदवार प्रा. अनिल सोले यांचे उत्पन्न तुलनेने कमी असल्याचे प्रतिज्ञापत्रातून स्पष्ट झाले.

वंजारी यांचा लेखाजोखा

वंजारी यांनी २०२१-२२ मध्ये स्वतःचे वार्षिक उत्पन्न ४६ लाख ३८ हजार ५०० रुपये असल्याचे नमूद केले होते. २०२५-२६ मध्ये हे उत्पन्न वाढून १ कोटी ५५ लाख ३९ हजार ८७० रुपये झाले आहे. त्यांच्या पत्नीचे उत्पन्नही ११ लाख ८५ हजार २८० रुपयांवरून १४ लाख ६४ हजार १७० रुपयांवर पोहोचले आहे. वंजारी यांच्याकडे ३ कोटी ८३ लाख ९६ हजार ४४६ रुपयांची चल, तर ९ कोटी ९७ लाख ९५ हजार ९६१ रुपयांची अचल संपत्ती आहे. त्यांच्यावर ५ कोटी ३० लाख ३० हजार ९३१ रुपयांचे कर्ज असून, त्यांचे शिक्षण एलएलबीपर्यंत झाले आहे.

कोहळेंची आर्थिक स्थिती

भाजपचे उमेदवार सुधाकर कोहळे यांच्या उत्पन्नातही मोठी वाढ झाली आहे. २०२१-२२ मध्ये त्यांचे वार्षिक उत्पन्न १० लाख ५४ हजार ४६० रुपये होते. २०२५-२६ मध्ये ते १ कोटी ३८ लाख २९ हजार ५२० रुपये झाले. त्यांच्या पत्नीचे उत्पन्न ९ लाख ६५ हजार ३४० रुपयांवरून ११ लाख ७० हजार ८२० रुपयांवर पोहोचले आहे. कोहळे यांच्या नावावर ३ कोटी ५८ लाख ५ हजार ७३ रुपयांची जंगम आणि ४ कोटी ३० लाख ९ हजार ४०० रुपयांची स्थावर मालमत्ता व पत्नीच्या नावावर अनुक्रमे १ कोटी ६८ लाख ५६ हजार १२२ आणि १ कोटी ४५ लाख ५७ हजार ४६८ रुपयांची मालमत्ता आहे. त्यांच्यावर ४० लाख ६२ हजार ७७१ रुपयांचे कर्ज आहे. त्यांचे शिक्षण बी.एससी, बी.एड. झाले आहे.

सोले यांचे वार्षिक उत्पन्न १९ लाख

नागपूरचे भाजपचे बंडखोर उमेदवार प्रा. अनिल सोले यांचे वय ६७ वर्षे असून, त्यांचे वार्षिक उत्पन्न १९ लाख ३१ हजार ६१० रुपये, तर पत्नीचे उत्पन्न १७ लाख ४१ हजार १३० रुपये आहे. त्यांच्या नावावर ९५ लाख ९१ हजार १३६ रुपयांची जंगम आणि ९३ लाख ७० हजार रुपयांची स्थावर मालमत्ता आहे. पत्नीच्या नावावर ४२ लाख ९८ हजार ९१७ रुपयांची जंगम आणि ४४ लाख ८० हजार ६२५ रुपयांची स्थावर मालमत्ता आहे. ते गणितात एम.एससी. झाले आहेत.