'हिंदुस्थानी भाऊ' पुन्हा अडचणीत ; नागपूर पोलिसांकडून नोटीस

नागपूर : दहावी, बारावीच्या विद्यार्थ्यांना आंदोलनासाठी भडकवल्याप्रकरणी हिंदुस्थानी भाऊ (Hindustani Bhau)उर्फ विकास पाठक याला गुरुवारी जामीन मंजूर करण्यात आला आहे. जामीन मिळताच नागपूर पोलिसांनी त्याला नोटीस बजावली आहे. ता. २२ फेब्रुवारी रोजी पोलिस ठाण्यात हजर राहण्याचा आदेश नागपूर पोलिसांनी दिला आहे.

राज्यात १० वी आणि १२ वीच्या परीक्षा ऑफलाईन ऐवजी ऑनलाईन घेण्यात यावी, या मागणीसाठी काही दिवसापूर्वी विद्यार्थी रस्त्यावर उतरले आणि आंदोलन सुरू केले होते. या विद्यार्थ्यांना भडकवल्याचा आरोप हिंदुस्थानी भाऊ वर आहे. याप्रकरणी त्याला १ फेब्रुवारीला अटक केली होती. १४ दिवसांच्या न्यायालयीन कोठडीनंतर त्याला जामीन मंजूर करण्यात आला. (Nagpur Police Issues Notice to Hindustani Bhau)

काल (गुरुवारी) सेशन्स कोर्टाकडून त्याला सशर्त जामीन मंजूर करण्यात आला आहे. ३० हजार रुपयांची वैयक्तिक हमी आणि तितक्याच रकमेसह एक किंवा दोन हमीदार देण्याच्या अटीवर सेशन्स कोर्टाने भाऊला जामीन मंजूर केला आहे. , हा जामीन मिळताच आता नागपूर पोलिसांनी त्यांना नोटीस बजावली आहे.

मुंबईसह नागपूर, औरंगाबाद, उस्मानाबाद, पुणे याठिकाणी बोर्डाची ऑफलाईन परीक्षा रद्द करावी यासाठी ३१ जानेवारी रोजी 'हिंदुस्थानी भाऊ' मुळे मोठ्या संख्येने विद्यार्थ्यांनी आंदोलन केलं होते. दहावी-बारावी विद्यार्थ्यांच्या परीक्षेबाबत अफवा पसरवणाऱ्या हिंदुस्तानी भाऊला धारावी पोलिसांनी १ फेब्रुवारीला अटक केली होती.

मुंबईत धारावीत शेकडो विद्यार्थी रस्त्यावर उतरले तर नागपूरमध्ये बसची तोडफोड केल्याचंही समोर आलं. 'हिंदुस्थानी भाऊ'च्या आवाहनानंतर ऑफलाईन परीक्षा रद्द करण्यासाठी आम्ही आंदोलनात उतरलो, असं मुंबईत जमलेल्या अनेक विद्यार्थ्यांनी सांगितले होते.

धारावीतील हिंसक आंदोलन प्रकरणी त्याला अटक करण्यात आली. बांद्रा महानगर दंडाधिकारी कोर्टाने हिंदुस्तान भाऊचा जामीन अर्ज फेटाळला होता. मुंबईत शालेय शिक्षणमंत्री वर्षा गायकवाड (Varsha Gaikwad)यांच्या घराबाहेर मोठ्या संख्येत विद्यार्थी एकवटले आणि आंदोलन सुरू केले होते. विद्यार्थ्यांच्या या आंदोलनामुळे एकच खळबळ उडाली होती.