Rohit Pawar : कर्जत-जामखेड सोडून मी कोठेही जाणार नाही; रोहित पवारांनी दिले स्पष्टीकरण

Nagpur, 26 August : मी कधीही कर्जत-जामखेड सोडणार नाही. काहीही झालं तर मी कर्जत-जामखेड मतदारसंघातूनच निवडणूक लढवणार आहे. जनतेच्या पाठिंब्याने आणि आशीर्वादाने मला विश्वास आहे की, मागच्या मताधिक्यापेक्षा अधिकचे मताधिक्य घेऊन निवडणुकीत मी विजयी होईन, असा विश्वासही रोहित पवार यांनी बोलून दाखवला.

आमदार राेहित पवार (Rohit Pawar) यांनी केंद्रीय रस्ते वाहतूक मंत्री नितीन गडकरी यांची भेट घेतली. त्यानंतर माध्यमांशी बोलताना त्यांना तुम्ही बारामतीतून निवडणूक लढवणार आहात का, असा प्रश्न विचारण्यात आला. त्या वेळी त्यांनी आपण कर्जत जामखेड मतदारसंघ सोडून कोठेही निवडणूक लढविण्यासाठी जाणार नाही, असे स्पष्ट केले.

कर्जत-जामखेड मतदारसंघात झालेल्या माझ्या मेळाव्याला माझ्या सर्व बहिणी प्रेमाने आल्या होत्या. मोदींच्या जळगावच्या मेळाव्यात मात्र पाचशे रुपये देऊन महिला आणल्या होत्या, असा आरोपही रोहित पवार यांनी महायुतीच्या जळगावमधील मेळाव्याबाबत बोलताना केला.

ते म्हणाले, जळगावच्या मेळाव्यात मोदी यांनी एक विधान केलं की, महिलांवर अत्याचार करणाऱ्या व्यक्तीला सोडू नका. त्याला मदत करणाऱ्या लोकांनाही सोडू नका. याचा अर्थ त्यांचा महायुती सरकारवरच विश्वास राहिलेला नाही. कारण, या सरकारने लोकसभा निवडणुकीत गुंडांचा वापर काय पद्धतीने केलेला आहे, हे आपण सर्वांनी पाहिले आहे. त्यामुळे आता मोदी यांनीच राज्यात बदल होईल.

रोहित पवार म्हणाले कर्जत-जामखेड मतदारसंघात माझ्या विरोधात ज्यांना कोणाला निवडणुकीला उभे राहायचे आहे, त्यांनी उभं राहावं. मतं खाण्यासाठी किती लोकांना उभं करायचं आहे, तेवढ्या लोकांना उभं करावं. काही केलं तरी कर्जत-जामखेडमधील लोकांवर माझा विश्वास आहे.

कर्जत-जामखेडच्या जनतेने मला लढायला शिकवलं आहे, त्यामुळे त्यांच्यासाठी आणि विचारांसाठी भल्या भल्याबरोबर मी भिडायला तयार आहे, असे प्रतिआव्हान रोहित पवार यांनी विरोधकांना दिले.