ShivSena MLA Disqualification : राहुल नार्वेकरांच्याविरोधात आंदोलन ठाकरे गटाला भोवले, पोलिसांकडून 10 जणांना अटक

Nagpur : विधानसभाध्यक्ष राहुल नार्वेकर यांनी आमदार अपात्रतेप्रकरणी नुकताच निकाल दिला. या निकालाने शिंदे गटाला मोठा दिलासा मिळाला. मात्र, त्यानंतर उद्धव ठाकरे गटाकडून राहुल नार्वेकर यांचा निषेध करण्यात आला. उद्धव ठाकरे या निर्णयाविरोधात सुप्रीम कोर्टात गेले आहेत. मात्र, ठाकरे गटाचे पदाधिकारी आक्रमक झाले असून ठिकठिकाणी आंदोलन करीत नार्वेकरांचा निषेध नोंदवत आहेत. असाच निषेध नोंदवणाऱ्या ठाकरे गटाच्या नागपूर जिल्हाध्यक्षांना चांगलेच महागात पडले.

नार्वेकरांच्याविरोधात आंदोलन करणाऱ्या नागपुरातील ठाकरे गटाचे जिल्हाध्यक्ष देवेंद्र गोडबोले यांच्यासह 10 जणांना पोलिसांनी शुक्रवारी अटक केली. गोडबोले नार्वेकर यांच्याविरोधात दोन दिवस आंदोलन करीत होते. आंदोलन करताना त्यांनी प्रतीकात्मक अंत्ययात्रा काढली होती. तसेच मुंडण आंदोलनही केले होते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

आंदोलन करताना पोलिसांनी गोडबोले यांना समजावण्याचा प्रयत्न केला. मात्र, गोडबोले यांनी पोलिसांशी हुज्जत घालत सरकारी कामात अडथळा आणला. त्यांनी काढलेल्या प्रतीकात्मक अंत्ययात्रेतदेखील बराच गोंधळ झाला. सरकारी कामात अडथळा आणल्याच्या कारणावरून पोलिसांनी गोडबोले यांच्यासह 10 कार्यकर्त्यांना अटक केली होती.

ठाकरे गटाकडून नार्वेकर यांच्याविरोधात आक्रमक भूमिका घेतली आहे. ठाकरे गटाचे नेते अनिल परब यांनी थेट राहुल नार्वेकरांवर आरोप केला आहे, की त्यांनी ज्याआधारे निकाल दिला तो आधारच मुळात चुकीचा आहे. कारण शिवसेनेच्या घटनेमध्ये उद्धव ठाकरे हे पक्षप्रमुख म्हणून नोंद केल्यानंतर त्याची प्रत निवडणूक आयोगाला देण्यात आली होती. त्याची पोहोचदेखील आमच्याकडे आहे.

(Edited By Roshan More)

R...