Raj Thackeray in Nagpur: ''...म्हणून मनसे वाढत असताना त्रास होणारच!''; राज ठाकरेंचा टीकेचा रोख नेमका कुणाकडे?

Raj Thackeray News: ज्यांना हसायचं असेल तर त्यांनी हसावं. तुम्ही घट्ट पाय देऊन उभे राहा. कालांतराने त्यांच्या लक्षात येईल हे मोठे झाले. यांचे आमदार, खासदार, नगरसेवक निवडून येऊ लागले आहेत. काही जणांनी इतके वर्ष पक्षांची दलाली केली असेल, तर त्यांना दुसरा पक्ष वाढत असताना त्रास होणारच आहे अशा शब्दांत मनसे अध्यक्ष राज ठाकरेंनी टोला लगावला.

मनसे अध्यक्ष राज ठाकरे (Raj Thackeray) हे एकदिवसीय नागपूर दौर्यावर आहेत. यावेळी ते बोलत होते. ठाकरे म्हणाले, सर्वच राजकीय पक्ष यश अपयशाच्या प्रक्रियेतून जात असतात. कालांतराने मतदार त्याच त्याच लोकांना कंटाळतात. आज आमच्या शाखाध्यक्षांना बघून लोकं म्हणतील हे पोट्टं काय करणार? मात्र, काही दिवसांनी हे पोट्टं तुमच्यावर वरवंटा फिरवेल असेही राज ठाकरे यांनी सुनावले.

गेल्यावेळी मी दौऱ्यावर आलो, तेव्हा मनसेला पदाधिकारी मिळत नाही अशा बातम्या आल्या होत्या. त्यांच्या डोळ्यात अंजन घालावं यासाठी पदाधिकाऱ्यांना आज पत्रवाटप करण्यात आले आहे. काही पत्रकार एखाद्या पक्षासाठी वाहलेले असतात. काही जणांनी इतके वर्ष पक्षांची दलाली केली असेल, तर त्यांना दुसरा पक्ष वाढत असताना त्रास होणारच आहे. मात्र, नागपूरमधील काही पत्रकार मनसेला प्रोत्साहन देत आहेत, अशी प्रतिक्रिया राज ठाकरेंनी दिली.

आजचा काळ पाहिला तर यांना हवंय काय? असं वाटतं. सर्व गोष्टी लवकर हव्यात. वडा टाकला की लगेच तळून यायला पाहिजे. मनसेच्याही वाट्याला यश आलं. अपयश आलं. पण आपण खचलो नाही. मी खचणार नाही. ज्या घरात होतो तिथे अनेक पराभव पाहिले. पराभूत झाल्याने रडणारी माणसे पाहिले. मी कसा खचणार? असा सवालही त्यांनी यावेळी उपस्थित केला.