Kedar Dighe : केदार दिघेंचा निवडणूक आयोगाच्या अधिकाऱ्याला फोन, सुरवातीला आरोप नंतर संतापले...

Mumbai News : राज्यातील हाय व्होल्टेज लढतीपैंकी एक म्हणजे ठाण्यातील कोपरी पाचपाखाडी विधानसभा मतदारसंघातील.

धर्मवीर आनंद दिघे यांचे शिष्य मुख्यमंत्री एकनाथ शिंदेंविरुद्ध शिवसेना उद्धव बाळासाहेब ठाकरे पक्षाचे उमेदवार तथा आनंद दिघे यांचे पुतणे केदार दिघे यांच्यात इथं लढत होत आहे. या मतदारसंघातील ही हाय व्होल्टेज निवडणूक आयोगाला झेपत नसल्याचे शिवसेना ठाकरे पक्षाचे उमेदार केदार दिघे यांच्या संतापल्यावरून दिसतं आहे.

ठाणे जिल्ह्यातील कोपरी पाचपाखाडी विधानसभा मतदारसंघात एकनाथ शिंदे (Eknath Shinde) यांच्या शिवसेना पक्षाच्या नेत्यांकडून आचारसंहितेचा वारंवार भंग होताना दिसतो आहे. याबाबत शिवसेना उद्धव बाळासाहेब ठाकरे पक्षाकडून वारंवार तक्रारी होऊन देखील निवडणूक आयोगाने नेमलेल्या अधिकाऱ्यांकडून कारवाई होत नाही. या प्रकारावर शिवसेना ठाकरे पक्षाचे उमेदवार केदार दिघे चांगलेच संतापले आहेत.

केदार दिघे यांनी याबाबत निवडणूक (Election) आयोगाने नेमलेल्या अधिकाऱ्यांना फोन लावून जाब विचारला. सुरवातीला संयमाने घेतले, पण नंतर केदार दिघे संतापले. 'झेपत नसेल, तर लिहून द्या. पुढं काय करायचे ते मी करतो', असा इशारा केदार दिघे यांनी दिला. केदार दिघे यांनी निवडणूक आयोगाने नेमलेल्या अधिकाऱ्याशी बोलतानाचा व्हिडिओ समाज माध्यमांवर शेअर केला आहे.

शिवसेना ठाकरे पक्षाचे उमेदवार केदार दिघे यांनी समोरच्या अधिकाऱ्याशी संवाद साधताना "कायदे फक्त आमच्यासाठी आहेत का? आम्ही सांगितल्यावर आणि दाखवल्यावर कारवाई करता, हा कोणता कारभार आहे. लाज वाटली पाहिजे. अधिकारी असून तुम्हाला उमेदवार सांगतो आहे. नसेल होणार, तर लिहून द्या. झेपणार नाही म्हणून. लिहून देता का?", अशी प्रश्नार्थी विचारणा केली.

"हे सगळं कधी केले पाहिजे? असा प्रश्न केदार दिघेंनी निवडणूक आयोगाला केला. आचारसंहितेचा कायदा फक्त आम्हाला, बाकीचा कोणाला नाही का? तुम्ही एवढे हेल्पसेल आहात का? निवडणूक आयोगाच्या अधिकाऱ्यांना काही नियम आहेत का नाही? उमेदवारांनी दाखवल्यावरच नियमांची आठवण होते का? दहा ठिकाणी दाखवल्यात आचारसंहिता भंगाचे प्रकार, मॅनेज नाही ना, कालची गाडी दाखवली तशी?", असा टोला देखील केदार दिघेंनी निवडणूक आयोगाने नेमलेल्या अधिकाऱ्यांशी फोनवर बोलताना लगावला.