विधान परिषद : भाजपकडून बावनकुळे, महाडिक; पण चित्रा वाघांना संधी नाही

दिल्ली : भारतीय जनता पक्षाने विधान परिषदेसाठी आपल्या उमेदवारांची घोषणा केली असून नागपूरमधून माजी ऊर्जामंत्री चंद्रशेखर बावनकुळे (Chandrashekhar Krishnarao Bawankule) यांना संधी देत त्यांचे पुनर्वसन करण्याचा निर्णय घेतला आहे. कोल्हापूरमध्ये अपेक्षेप्रमाणे अमल महाडिक (Amal Mahadeorao Mahadik) यांना गृह राज्यमंत्री सतेज पाटील यांच्या विरोधात उतरविण्यात आले आहे. त्यामुळे कोल्हापूरातील लढत लक्षवेधी ठरणार आहे.

मुंबईतून राजहंससिंह यांना संधी देण्यात आली आहे. येथे चित्रा वाघ यांना उमेदवार मिळण्याची अपेक्षा होती. मात्र तेथे काॅंग्रेसमधून आलेल्या राजहंससिंह यांना उतरविण्यात आले आहे. उत्तर प्रदेशातील व्होट बॅंकेमध्ये त्यांचा प्रभाव आहे. आगामी महापालिका निवडणुकीत त्यांचा उपयोग करून घेण्याचा भाजपचा प्रयत्न आहे.

अकोला-बुलढाणा-वाशिम मतदारसंघात वसंत खंडेलवाल यांना उमेदवारी देऊन तेथे शिवसेनेचे गोपीकिशन बाजोरिया यांना कडवी लढत देण्याचा भाजपचा प्रयत्न आहे. धुळे-नंदुरबारमध्ये विद्यमान आमदार अमरिश पटेल यांना अपेक्षेप्रमाणे संधी मिळाली आहे. येथे पटेल यांच्याविरुद्ध शिवसेनेचे चंद्रकांत रघुवंशी असा सामना होऊ शकतो.

विधानसभेतून निवडून द्यावयाच्या जागेसाठी संजय केणेकर यांचा अर्ज पक्षाने दाखल केला आहे. येथे काॅंग्रेसचे प्रज्ञा सातव यांच्याविरोधात भाजप निवडणूक लढवत आहे. येथे भाजप मागे घेणार का, याची उत्सुकता आहे.

मुंबई महापालिकेतून दोन जागा विधान परिषदेवर निवडून द्यायच्या आहेत. त्यात शिवसेनेने सुनील शिंदे यांची उमेदवारी दिली आहे. भाजपचे राजहंससिंह व शिंदे हे येथून बिनविरोध निवडून जाणार का, हे पाहावे लागेल.