मजूर प्रकरणी अडचणीत आलेेले दरेकर अमित शहांकडे मागणार दाद

मुंबई : भाजप (BJP) नेते आणि राज्याचे विधान परिषदचे विरोधी पक्षनेते प्रवीण दरेकर (Pravin Darekar) हे अडचणीत आले आहेत. मुंबै बँकेची मजूर म्हणून निवडणूक लढवल्याने दरेकरांवर गुन्हा दाखल झाला आहे. या प्रकरणी दरेकरांच्या अटकेची मागणी जोर धरू लागली आहे. या प्रकरणी दरेकर हे आता केंद्रीय सहकारमंत्री अमित शहांकडे (Amit Shah) धाव घेणार आहेत. खुद्द दरेकर यांनीच याबद्दल माहिती दिली आहे. (Pravin Darekar News)

दरेकरांच्या विरोधात आज आम आदमी पक्षाने (AAP) भाजपच्या कार्यालयासमोर आंदोलन केले. दरेकर यांना अटक करण्याची मागणी आपने लावून धरली आहे. या पार्श्वभूमीवर दरेकर हे आता थेट अमित शहांच्या भेटीला जाणार आहेत. शहा हे केंद्रीय गृहमंत्री असून, सहकार मंत्रालयही त्यांच्याकडेच आहे. याबद्दल दरेकरांनी ट्विटरवर म्हटले आहे की, ज्या कारणास्तव मुंबई बँकेची चौकशी लावणा-या सरकारने राज्यातील अन्य जिल्हा बँकांचीही त्याचप्रकारे चौकशी केली पाहिजे ही माझी मागणी आहे. जर सरकार केवळ सूडभावनेने निवडक लोकांवर चौकशीचा ससेमिरा लावत असेल तर मी देशाचे सहकारमंत्री आणि गृहमंत्री यांच्याकडे यासंदर्भात सीबीआय चौकशीची मागणी करून राज्यातील सहकार साफसुथरा व्हावा, यासाठी भूमिका घेईन.

दरेकरांच्या जामीन अर्जावरील सुनावणी उच्च न्यायालयाने दोन आठवड्यांनी ठेवली आहे. याचवेळी दरेकरांना उच्च न्यायालयाने दिलासाही दिला आहे. सत्र न्यायालयाने त्यांना अटकेपासून दिलेले संरक्षण उच्च न्यायालयाने कायम ठेवले आहे. मजूर प्रकरणी दाखल गुन्ह्यात अटक न करण्याची दरेकर यांची मागणी उच्च न्यायालयाने आधी फेटाळली होती. त्यानंतर दरेकरांनी सत्र न्यायालयात अटकपूर्व जामिनासाठी अर्ज दाखल केला होता. सत्र न्यायालयाने दरेकरांचा अटकपूर्जाव जामीन अर्ज फेटाळला आहे. या निर्णयाला दरेकरांनी आता उच्च न्यायालयात आव्हान दिले आहे.

मुंबै बँकेच्या निवडणुकीत मजूर वर्गातून निवडणूक लढवणारे भाजप नेते प्रवीण दरेकर अडचणीत आले आहेत. या प्रकरणात मुंबई पोलिसांकडून दरेकर यांच्यावर गुन्हा दाखल करण्यात आला आहे. बँकेच्या निवडणुकीत प्रवीण दरेकर यांनी मजूर प्रवर्गातून अर्ज भरला होता. याला आक्षेप घेत तक्रार दाखल करण्यात आली होती. सहकार विभागाने याची चौकशी करुन दरेकरांना अपात्र ठरवले होते. मजूर म्हणून प्रवीण दरेकर हे सदस्यत्वाला अपात्र असल्याचे सहकार विभागाने म्हटले होते.

कामगार असल्याचा दावा करून दरेकर हे 1999 मध्ये कामगार सहकारी संस्थेचे सदस्य झाले. त्यांनी 2016 मध्ये विधान परिषद निवडणुकीपूर्वी दाखल केलेल्या प्रतिज्ञापत्रात त्यांच्याकडे 2.3 कोटी रुपयांची मालमत्ता होती. त्यांच्याकडे 2.5 लाख रुपयांच्या मासिक उत्पन्नासह 91 लाख रुपयांची रोकड होती. यावरून ते मजूर नसल्याचे दिसून येते, असे सरकारी वकिलांनी सत्र न्यायालयाच्या निदर्शनास आणून दिले होते. विधान परिषदेच्या निवडणुकीवेळी दिलेल्या प्रतिज्ञापत्रात दरेकरांनी उत्पन्नाचे साधन म्हणून स्वतंत्र व्यवसाय असे नमूद केले होते.