Badlapur Firing : भाजप आमदार कथोरे घरासमोरील गोळीबारामागे शिवसेनेचा पदाधिकारी; जखमीच्या दाव्यानं खळबळ

Badlapur BJP MLA firing : मुंबईतील बदलापुरात भाजप आमदार किसन कथोरे यांच्या घरासमोर दुपारी झालेल्या गोळीबारात जखमी अल्ताफ शेख यांची प्रकृती स्थिर झाल्यानंतर त्यांनी एका व्हायरल व्हिडिओमार्फत गौप्यस्फोट केला आहे.

या हल्ल्यामागील सूत्रधार म्हणून त्याने उपमुख्यमंत्री एकनाथ शिंदे यांच्या शिवसेना पक्षाचे उपशहरप्रमुख जगदीश कुडेकर यांचे नाव उघड केले आहे. त्यामुळे या प्रकरणाची शहरात मोठी चर्चा सुरू झाली आहे.

हा गोळीबार एकनाथ शिंदे यांच्या शिवसेना (Shivsena) पक्षाचा उपशहरप्रमुख जगदीश कुडेकर याच्या सांगण्यावरून केला, असा थेट आरोप गोळीबारात जखमी झालेल्या अल्ताफ शेख याने केला आहे. शिवाय माझ्या कुटुंबियांच्या जीवाला धोका असल्याचेही त्याने सांगितले आहे.

याआधी जगदीशने माझं दुकान जाळून टाकले होते. यासंदर्भाची तक्रार मी पोलिसांना (Police) केली; मात्र पोलिसांनी त्याकडे दुर्लक्ष केल्यानेच माझ्यावर हा जीवघेणा हल्ला झाल्याचे अल्ताफ याने स्पष्ट केले. अल्ताफ याच्या दावाने या प्रकरणाला वेगळं वळण लागलं आहे.

अल्ताफने पोलिसांना दिलेल्या जबाबात शिवसेना उपशहरप्रमुख जगदीश कुडेकर हा या गोळीबाराचा सूत्रधार असल्याचे सांगितले; मात्र पोलिसांनी एफआयआरमध्ये जगदीशचे नाव घेतले नसल्याचा आरोप अल्ताफ याने केला. जगदीश कुडेकर हा शिवसेना पक्षाचा उप शहरप्रमुख असल्याने राजकीय दबावापोटी पोलिस, असे काम करीत असल्याचा खळबळजनक आरोप अल्ताफने केला आहे.

उपशहरप्रमुख जगदीश कुडेकर यांनी याबाबत, मी ही घटना घडली, त्या वेळी माझ्या वैयक्तिक कामासाठी बदलापूर पश्चिम पोलिस ठाण्यात होतो, असा दावा केला आहे.

तसंच माझे अल्ताफ शेख याच्यासोबत किरकोळ वाद होते. काल त्याच्यावर जो हल्ला झाला त्यातील एक आरोपी हा माझ्याकडे नोकरीला आहे; पण नोकरीनंतर कोण काय करते, त्याची जबाबदारी माझी नाही. त्यामुळे हे आरोप बिनबुडाचे आहेत. सगळ्या घटनेची चौकशी पोलिस करीत असून, सत्य काय ते समोर येईलच, असेही कुडेकर यांनी म्हटले आहे.