Saree Controversy : हर्षवर्धन सपकाळांनी पगारे मामांना खांद्यावर बसवलं, भाजपने डिवचलं, म्हणाले, 'अ‍ॅक्टर रडक्यांना...'

Saree Controversy News : डोंबिवलीमधील काँग्रेसचे ज्येष्ठ पदाधिकारी प्रकाश पगारे उर्फ मामा यांना भाजपच्या पदाधिकाऱ्यांनी साडी नेसवली होती. पंतप्रधान नरेंद्र मोदी यांच्या साडी घातलेला फोटो त्यांनी शेअर केल्याचे सांगत भाजप पदाधिकाऱ्यांनी हे कृत्य केले. मात्र, मामा पगारे यांच्या मागे सगळी काँग्रेस उभी राहिली आहे. राहुल गांधी देखील त्यांना फोन केला. महाराष्ट्र काँग्रेसचे प्रदेशाध्यक्ष हर्षवर्धन सपकाळ यांनी तर जाहीर कार्यक्रमात मामा पगारेंना आपल्या खांद्यावर उचलून घेतले.

मामा पगारेंच्या पाठीशी काँग्रेस ठामपणे उभी असताना पंतप्रधान मोदींचा फोटो चुकीच्या पद्धतीने व्हायरलल केल्याने भाजप देखील आक्रमक आहे. भाजपचे जिल्हा उपाध्यक्ष संदीप माळी यांनी पगारेंवर संताप व्यक्त करताना म्हटले की, 'पगारे हे अॅक्टर आहेत. गुन्हा दाखल होऊ नये म्हणून रडण्याची अॅक्टिंग करत असतात. आम्ही अशा रडक्यांना भाव देत नाही.

माळी यांचा उल्लेख काँग्रेस जिल्हाध्यक्ष सचिन पोटे यांनी गुन्हेगार म्हणून केला होता. त्यावर बोलताना माळी म्हणाले, माझ्यावर दाखल झालेल्या गुन्ह्यातून माझी निर्दोष मुक्तता झाली आहे. पोटे यांनी यापुढे गुन्हेगार म्हणून आमचा उल्लेख केल्यास कायदेशीर कारवाई करण्यात येईल. दरम्यान, संघाच्या विरोधात विधान करणाऱ्यांच्या विरोधात गुन्हा दाखल करण्यात यावा अशी पोलीस उपायुक्त अतुल झेंडे यांच्याकडे आमची मागणी असल्याचेही त्यांनी म्हटले.

पगारेंचे वादग्रस्त विधान

काँग्रेसने मामा पगारेंचा सत्कार केला. त्यावेळी त्यांच्या डोळ्यात पाणी आले त्यांनी प्रदेशाध्यक्ष सपकाळ यांना मिठी मारली. मात्र,कार्यक्रमात त्यांनी डिसीपी ऑफीसच्या बाहेरच संघाचे नाव न घेता वादग्रस्त विधान केले. ते म्हणाले, आझादी जंग मे जो मर्द थे वो जंग गये, और जो नामर्द थे वो *****गये. दरम्यान, माळी आक्रमक भूमिका घेत संघाच्या विरोधात विधान करणाऱ्यांच्या विरोधात गुन्हा दाखल करण्यात यावा, अशी पोलीस उपायुक्त अतुल झेंडे यांच्याकडे आमची मागणी असल्याचे म्हटले.