BMC Covid Scam : आर्थिक गुन्हे शाखेकडून महापालिका उपायुक्त रमाकांत बिरादार यांना समन्स ; आज जबाब नोंदवणार

Mumbai : कोरोना काळातील बॉडी बॅग गैरव्यवहार प्रकरणी मुंबई पोलिसांच्या आर्थिक गुन्हे शाखेने महापालिका उपायुक्त रमाकांत बिरादार (Ramakant Biradar) यांना समन्स बजावले आहे. आज (शुक्रवारी) आर्थिक गुन्हे शाखेचे अधिकारी बिरादार यांचा जबाब नोंदवणार आहेत.

सध्या बिरादार हे उपमहापालिका आयुक्त झोन 2 आहेत. कोविड काळात ते केंद्रीय खरेदी विभागाचे प्रभारी होते. रमाकांत बिरादार यांचा जबाब यापूर्वी ईडीने नोंदवला आहे. याप्रकरणी माजी महापौर किशोरी पेडणेकर आणि तत्कालीन अतिरिक्त महापालिका आयुक्त पी वेलरासू यांच्यावरही याप्रकरणी गुन्हा दाखल करण्यात आला आहे.

आर्थिक गुन्हे शाखेनं काही दिवसांपूर्वी रमाकांत बिरादार यांच्यावर गुन्हा दाखल केला होता. आता याप्रकरणी त्यांची चौकशी होणार आहे.किशोरी पेडणकर यांना न्यायालयाकडून नुकताच दिलासा देण्यात आला आहे. पेडणेकर यांनी २९ ऑगस्टपर्यंत अटक करू नये, असा आदेश न्यायालयाने दिला आहे.

कोरोना संसर्गाच्यावेळी कोव्हिड उपचारांच्या औषधांची खरेदी करण्यात आली होती. पण ही खरेदी वाढीव दराने करण्यात आली होती. बॉडी बॅग खरेदीतही घोटाळा झाला होता.

बॉडी बॅग खरेदीबाबत यापूर्वी ईडीच्या सूत्रांनी माहिती दिली होती. त्यानुसार 2 हजार रुपये किंमतीची बॉडी बॅग 6 हजार 800 रुपयांना विकत घेण्यात आली होती. हे कंत्राट देताना महापालिकेतील काही अधिकाऱ्यांनी विरोध केला होता. या प्रकरणी हा गुन्हा आग्रीपाडा पोलीस ठाण्यात दाखल करण्यात आला होता.

Edited By : Mangesh Mahale