नखे कापून शहीद होण्याचा प्रयत्न : फडणविसांचा राऊतांना खोचक टोला

मुंबई : लोकांच्या घरात घूसून, माप घेऊन नोटिसा पाठवता, असे सांगत केंद्रीय मंत्री नारायण राणे (Narayan Rane) यांच्यावरील कारवाईचा उल्लेख करीत विरोधी देवेंद्र फडणवीस (Devendra Fadnavis) यांनी शिवसेनेचे खासदार संजय राऊत (Sanjay Raut) यांच्यावरील 'ईडी'च्या कारवाईबाबत बुधवारी सूचक विधान केले. पुराव्यावरून नोटिस आली आहे, आता कायद्यानेच उत्तर द्या, असा खोचक सल्लाही फडणवीसांनी राऊत यांना दिला. काही लोक नखे कापून शहीद होण्याचा प्रयत्न करतात, असा टोला त्यांनी लगावला.

भाजपच्या (BJP) स्थापना दिवसानिमित्त आयोजित कार्यक्रमानंतर फडणवीस यांनी शिवसेना, संजय राऊत, पर्यटन मंत्री आदित्य ठाकरे (Aditya Thackeray) यांच्यावर निशाणा साधला. राऊत यांच्यावरील कारवाईमागे राणे यांना अधिश बंगल्याबाबत मुंबई महापालिकेने दिलेल्या नोटिशीचा आधार असल्याचे फडणवीस यांच्या बोलण्यातून स्पष्ट झाले. 'ईडी'च्या कारवाईवरुन शिवसेनेच्या नेत्यांनी तपास यंत्रणा आणि केंद्र सरकारवर केलेले आरोप फडणवीस यांनी फेटाळून लावले. स्थापना दिनानिमित्त वसंत स्मृती कार्यालयात आयोजित कार्यक्रमाला पंतप्रधान यांच्या व्हर्च्युअल सभेला आमदार आशिष शेलार, मुंबई भाजपचे अध्यक्ष मंगलप्रभात लोढा, नरेंद्र पाटील, नीतेश राणे आदी उपस्थितीत होते.

यावेळी फडणवीस म्हणाले, किरीट सोमय्या यांच्याविरोधातील आरोपांत तथ्य नाही. तसा कोणताही पुरावाही नाही. भ्रष्टाचाराबाबत भाजप आणि सोमय्या बोलतच राहणार, असेही फडणवीस यांनी स्पष्ट केले. स्वाभिमानी शेतकरी संघटनेचे नेते राजू शेट्टी (Raju Shetty) यांनी महाविकास आघाडीतून बाहेर पडण्याचा निर्णय घेतला. त्यावर फडणवीस म्हणाले, राजू शेट्टी यांनी योग्य निर्णय घेतला.

मनसे ही भाजपची 'सी' टीम असल्याचे आदित्य ठाकरे यांनी म्हटले होते. त्यावर फडणवीस यांनी आदित्य यांच्यावर टीका केली. ते म्हणाले, शिवसेना ही काँग्रेस आणि राष्ट्रवादी काँग्रेसची कितवी टीम आहे, हे पाहावे, असा टोलाही त्यांनी लगावला. आपले ठेवायचे झाकून आणि दुसऱ्याचे बघायचे वाकून, अशी अवस्था शिवसेनेची झाली असल्याचेही ते म्हणाले.