अजितदादांसाठी लढाई सोपी नाही : देवेंद्र फडणवीस घेणार पुण्याचा चार्ज!

पुणे : पुणे (Pune) आणि पिंपरी-चिंचवड (Pimpri-Chinchwad) महापालिकांवर 2017 मध्ये झालेल्या निवडणुकीत भाजपने राष्ट्रवादीला शह देत सत्ता मिळावली होती. मात्र, राज्यात महाविकास आघाडी सरकार स्थापन झाल्यानंतर माजी उपमुख्यमंत्री अजित पवार (Ajit Pawar) पुण्याचे पालकमंत्री झाले होते. त्यांनी पुणे आणि पिंपरी-चिंचवड महापालिकेत व्यक्तीगत लक्ष देत होते. राज्यातील सत्तेच्या बळावर राष्ट्रवादी पुन्हा महापालिकांमध्ये सत्ता मिळवणार अशी सुरू होती. मात्र, आता सत्तांतर झाले असून आगामी निवडणुकांच्या पार्श्वभूमीवर उपमुख्यमंत्री देवेंद्र फडणवीस (Devendra Fadnavis) पुण्याचा चार्ज घेणार आहेत.

राज्यात महाविकास विकास आघाडीचे सरकार कोसळल्यानंतर भाजपने एकनाथ शिंदेंच्या गटासोबत हातमिळवणी करुन सरकार स्थापन केले. एकनाथ शिंदे यांच्यकडे मुख्यमंत्रीपदाची जबाबदारी सोपविण्यात आली. तर फडणवीस यांनी उपमुख्यमंत्रीपदाची शपथ घेतली आहे. फडणवीस उपमुख्यमंत्रीपदाची शपथ घेतल्यानंतर नागपुरला गेले होते. तिथे त्यांचे जल्लोषात स्वागत झाले. आता ते आपल्या कामाला लागणार असून पुणे महापालिकेच्या विविध प्रकल्पांचा ते आढावा घेणार आहेत.

पुणे महापालिकेवर सध्या प्रशासन आहे. आगाामी काळात पुणे आणि पिंपरी चिंचवड महापालिका निवडणुका आहेत. त्यामुळे फडणवीसांची पुणे भेट महत्त्वपूर्ण मानली जात आहे. आधीच्या महाविकास आघाडी सरकारने राज्यातील महापालिका निवडणुकांसाठी प्रभाग रचना बदलून चार ऐवजी तीनचा प्रभाग केला आहे. ही प्रभाग रचना भाजपसाठी अडचणीची असल्याची चर्चा सुरुवातीपासूनच आहे. त्यामुळे पुणे दौऱ्यात फडणवीसांसमोर स्थानिक नेत्यांकडून प्रभाग रचनेसंदर्भातील अडचणी मांडल्या जावू शकतात, असे सांगितले जात आहे.

मुंबईनंतर, पुणे महापालिका महत्वाची आहे. त्यातच पुणे जिल्हा हा राष्ट्रवादी काँग्रेसचा बालेकिल्ला मानला जातो. त्यामुळे अगामी महापालिका निवडणुकीत अजित पवार विरुद्ध देवेंद्र फडणवीस असा सामना रंगणार आहे.