Mankoli Bridge : माणकोली पूल ठरणार निवडणुकीचा मुद्दा, विरोधक करणार विजयाचा दावा

Dombivli : गेल्या आठ वर्षांपासून सुरू असलेल्या माणकोली पुलाचे काम पूर्ण झाले असले तरी हा पूल अद्यापही सुरू झाला नाही. त्यामुळे डोंबिवलीकर नाराज असल्याचे दिसत आहे. त्यामुळे हा पूल जर लवकरात लवकर सुरू झाला नाही तर याचा परिणाम येत्या निवडणुकीत सत्ताधाऱ्यांच्या मतदानावर होणार, अशी चर्चा दबक्या आवाजात रंगली आहे. या चर्चांची खबर मुख्यमंत्री एकनाथ शिंदे यांनादेखील लागली असून लवकरच ते कल्याण-डोंबिवलीचा दौरा करणार असून माणकोली पुलाचे उद्घाटन करणार असल्याचे सांगितले जात आहे.

पुलाच्या उद्घाटनाविषयी विरोधकांकडून मुख्यमंत्री एकनाथ शिंदे (Eknath Shinde) यांना टार्गेट केले जात आहे. या पुलाचे उद्घाटन झाले नाही तर डोंबिवलीकरांच्या नाराजीचा सामना सत्ताधाऱ्यांना करावा लागेल, हेच ओळखून पुलाच्या (bridge) उद्घाटनावरून विरोधक सत्ताधाऱ्यांना टार्गेट करीत असून मतांची बेगमी करीत आहेत.

गेली अनेक वर्षे या पुलासंदर्भात ऐकत आहोत. मात्र हा पूल अद्यापही पूर्ण झालेला नाही. त्यामुळे नाराज असल्याचे मत अनेक नागरिक उघडपणे बोलून दाखवत आहेत. मुख्यमंत्री एकनाथ शिंदे यांच्या डोळ्यात माणकोली पुलाचे उद्घाटन होणार असल्याची माहिती यावेळी देण्यात येत आहे. साधारण 25 जानेवारी रोजी त्यांचा डोंबिवली येथे विकासकामांच्या उद्घाटनासाठी दौरा होणार आहे. या उद्घाटनादरम्यानच ते माणकोली पुलाचेदेखील उद्घाटन करणार असल्याची चर्चा रंगलेली पाहायला मिळते.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

8 वर्षांपूर्वी भूमिपूजन

हा संपूर्ण पूल बांधण्यासाठी 223 कोटी इतका खर्च मंजूर करण्यात आला आहे. या पुलाची रुंदी 27 मीटर इतकी असून लांबी 1.24 किलोमीटर आहे. हा पूल तयार झाल्यास डोंबिवली-कल्याण येथे शिळ फाटा आणि भिवंडी बायपास रस्ता येथे होणारी वाहतूककोंडी कमी होण्यास मदत होणार आहे. त्याचबरोबर इंधनाची बचत होणार असून प्रवासाचा वेळ वाचणार आहे. या पुलाचे भूमिपूजन तत्कालीन मुख्यमंत्री आणि आताचे उपमुख्यमंत्री देवेंद्र फडणवीस यांनी सप्टेंबर 2016 मध्ये केले होते. मात्र अद्यापही या पुलाचे उद्घाटन झाले नसल्याने डोंबिवली पश्चिम येथील नागरिक नाराज असल्याचे पाहायला मिळत आहे.

(Edited By Roshan More)

R...