Pancham Kalani News : पवारांची परवानगी घेऊनच भाजपत प्रवेश केला; पण, बीजेपीने शब्द पाळला नाही : पंचम कलानींच्या वक्तव्याने खळबळ

Ulhasnagar News : उल्हासनगरमधील कलानी परिवार मध्यंतरी अडीच ते तीन वर्षांच्या काळासाठी भाजपमध्ये गेला होता. मात्र, भाजपचा दबाव असल्याने आपण जाताना राष्ट्रवादी काँग्रेसचे अध्यक्ष शरद पवार यांनी परवानगी घेऊनच गेलो होतो, असा खुलासा आता पप्पू कलानी यांची सून माजी महापौर पंचम कलानी यांनी केला आहे. त्यांच्या या वक्तव्याने चर्चांना उधाण आले आहे.

राष्ट्रवादी काँग्रेसचे नेते माजी मंत्री जितेंद्र आव्हाड आणि माजी खासदार आनंद परांजपे यांच्या उपस्थित उल्हासनगरमध्ये शनिवारी कार्यक्रमाचे आयोजन करण्यात आले होते. या कार्यक्रमामध्ये माजी महापौर पंचम कलानी (Pancham Kalani) यांनी केलेल्या वक्तव्यामुळे अनेकांच्या भुवया उंचावला आहेत.

उल्हासनगरचे माजी आमदार पप्पू कलानी सुरुवातीपासून शरद पवार (Sharad Pawar) यांचे निकटवर्तीय मानले जातात. पप्पू कलानी यांना एका हत्याप्रकरणात जन्मठेपेची शिक्षा सुनावण्यात आल्यानंतर मध्यंतरीच्या काळात पप्पू कलानी यांचा मुलगा ओमी कलानी याने भाजपसोबत जवळीक साधली होती. टीम ओमी कलानी नावाने संघटना स्थापन करत त्याचे सर्व उमेदवार भाजपच्या चिन्हावर उभे केले होते.

मात्र, राज्यात महाविकास आघाडी सरकार येताच पप्पू कलानी यांची जेलमधून सुटका झाली. भाजपपासून फारकत घेऊन पुन्हा एकदा कलानी परिवार राष्ट्रवादीत आला. यानंतर नुकत्याच झालेल्या एका कार्यक्रमात पप्पू कलानी यांची सून माजी महापौर पंचम ओमी कलानी यांनी एक वक्तव्य केले, आपण भाजपमध्ये (BJP) जाताना शरद पवार यांची परवानगी घेऊनच गेलो होतो, असा खुलासा पंचम कलानी यांनी केला. त्यांच्या या वक्तव्यामुळे उल्हासनगर शहरात चर्चांना मोठे उधाण आले आहे.

याबाबत त्यांना विचारले असता, तेव्हाची परिस्थितीच तशी होती की आपण शरद पवार यांच्या परवानगीने भाजपात गेलो होतो. कारण त्यावेळी काही मोठ्या कौटुंबिक अडचणी होत्या, असे कलानी म्हणाल्या. कलानी परिवार पुन्हा एकदा राष्ट्रवादीत आला, आता पंचम कलानींच्या वक्तव्यामुळे उल्हासनगरमध्ये एकच चर्चा सुरु झाली आहे.

Edited by : Amol Jaybhaye