Mayuti Politics : '...तर युतीला माझा विरोध', गणेश नाईकांनी रणशिंग फुंकले; एकनाथ शिंदेंना डिवचले!

राहुल क्षीरसागर

Ganesh Naik News : वरिष्ठ नेत्यांनी युतीचा आग्रह धरला आणि युतीत कार्यकर्त्यांचा सन्मान होत नसले तर पहिला विरोध मी करेन, अशी स्पष्टोक्ती वनमंत्री गणेश नाईक यांनी दिली. सेवा पंधरावडा निमित्ताने सेवा पंधरावडा निमित्ताने मंगळवारी भाजप कार्यालयात आयोजित बैठकीत पदाधिकाऱ्यांना मार्गदर्शन करताना मंत्री नाईक यांनी ठाणे पालिका निवडणुकीचे रणशिंग फुंकले.

राज्यात शिवसेना - भाजप हातात हात घालून सत्ता हाकत असली तरी, दुसरीकडे ठाणे जिल्ह्यात उपमुख्यमंत्री एकनाथ शिंदे आणि वनमंत्री गणेश नाईक यांच्यात संघर्ष दिसून येत आहे. नवी मुंबई पालिकेवरही अनेकांचा डोळा आहे पण त्यांना मी उत्तर देणार आहे. वरिष्ठ नेते महायुतीबाबत निर्णय घेतील. पण, युतीत कार्यकर्त्यांचा सन्मान होत नसले तर मी कार्यकर्त्यावर अन्याय होऊ देणार नाही. त्यावेळी पहिला विरोध करणारा मी असेन, असे नाईक म्हणाले.

नवी मुंबई महापालिका निवडणुक प्रारुप प्रभाग रचनेवरून गणेश नाईक यांनी नाराजी व्यक्त केली होती. प्रभाग रचनेविरोधात चार हजाराहून अधिक तक्रारी दाखल झाल्या असून त्या नाईक समर्थकांनी दाखल केल्याचे समजते. ठाण्याचा प्रभाव असलेल्या प्रभाग रचनेवरून अस्वस्थ असलेल्या नाईक यांनी याप्रकरणी थेट मुख्यमंत्र्यांकडे तक्रार करणार असल्याचा इशारा दिला होता. या प्रकरणामुळे पालिका निवडणुकांच्या तोंडावर शिंदे आणि नाईक संघर्ष आणखी वाढला आहे.

ठाण्यात सत्ता आणायची असेल तर...

नवी मुंबई महापालिकेत मी पक्षाला सत्ता मिळवून दिली. ठाण्यातही मी सत्ता मिळवून देऊ शकतो. पण, त्यासाठी रावणाच्या अंहकाराचे दहन करावे लागले. त्यासाठी तुम्ही तयार आहात का”, अशी विचारणा नाईक यांनी करताच त्याला पदाधिकाऱ्यांनीही जोरदार प्रतिसाद दिला. त्यापूर्वी रावणाने अंहकार केला त्याचा नाश झाला, असे सांगत कुणीही अंहकार बाळगू नये, असा सल्ला देखील कोणाचेही नाव न घेता दिला.