Gunaratna Sadavarte : इकडे आंदोलन तिकडे पोलिस बंदोबस्तात गुणरत्न सदावर्ते हायकोर्टात पोहोचले, केली मोठी मागणी

Maratha Reservation News : मनोज जरांगे पाटील यांचे आंदोलन बेकायदेशीर आहे, असा दावा करत त्यांना मुंबई सोडण्याचे आदेश द्यावेत यासाठी अ‍ॅड. गुणरत्न सदावर्ते यांनी मुंबई हायकोर्टात याचिका दाखल केली आहे. पोलिस बंदोबस्तामध्ये अ‍ॅड. सदावर्ते हे हायकोर्टात दाखल झाले.

संपूर्ण दक्षिण मुंबईत रास्ता रोको केला जातोय. त्यामुळे सामान्य मुंबईकरांना त्रास होतोय, असे महाअधिवक्ता बीरेंद्र सराफ यांनी कोर्टात सांगितले तर, जरांगेचे आंदोलन बेकायदा असल्याचे सदावर्ते म्हणाले. न्यायमूर्ती रवींद्र घुगेंच्या खंडपीठासमोर सुनावणी सुरू आहे.

आंदोलकांना दिलेल्या अटी आणि शर्तींची पडताळणी न्यायालयाकडून केले जात आहे. तसेच नियमांचे उल्लंघन होत असल्यची नोटीस जरांगेना दिली होती का याची विचारणा देखील कोर्टाकडून करण्यात आली आहे. दरम्यान, परवानगी देतानाच अटींचे पालन करू असे हमीपत्र आंदोलकांकडून देण्यात आल्याचे महाअधिवक्त्यांकडून सांगितले.

कैलास खांडबाहले या मराठा आंदोलकाने देखील हस्तक्षेप याचिका दाखल केली आहे. त्यामुळे पाच वकिलांचे युक्तीवाद सुरू आहे. केवळ पाच हजार आंदोलकांना परवानगी असताना त्यापेक्षा जास्त आंदोलक आंदोलनात आले आहेत. आंदोलनाची सहा वाजतापर्यंतची परवानगी असताना त्यानंतर देखील आझाद मैदानखाली खाली केले नाही, असे आंदोलनालाच्या विरोध करणाऱ्या वकिलाने युक्तिवादात केले.

शनिवार, रविवारचे आंदोलन विना परवानगी

शनिवारी, रविवारी आंदोलनाला परवानगी देऊ नका, असे कोर्टाचे आदेश होते. त्याप्रमाणे परवानगी देण्यात आली नव्हती. त्यामुळे विनापरवानगी शनिवार-रविवारचे आंदोलन करण्यात आले असल्याची माहिती सरकारतर्फे महाधिवक्ते बिरेंद्र सराफ यांनी कोर्टात दिली.