Uddhav Thackeray On BJP : 'मी भाजपशी 'पॅचअप' करू शकलो असतो पण..' ; उद्धव ठाकरेंचं सूचक विधान !

Mumbai News : शिवसेनेत घडलेल्या अभूतपुर्व फुटीनंतर शिवसेना ठाकरे गट आणि शिंदे गट असे दोन गट तयार झाले. यानंतर ठाकरे गट प्रमुख उद्धव ठाकरे (Uddhav Thackeray) आणि भारतीय जनता पार्टीमधील (BJP) वितुष्ट दिवसेंदिवस वाढतच गेले. शिवसेना - भाजप युती तुटायला ठाकरे गटाने भाजपला जबाबदार धरले. केंद्रीय गृहमंत्री अमित शाह (Amit Shah) यांनी शब्द फिरवल्याने महाविकास आघाडी करावी लागली, असे ठाकरे गटाकडून वारंवार सांगण्यात आले.

दुसरीकडून भाजपनेही ठाकरेंनी युती धर्म न पाळता पाठीत खंजीर खुपसल्याचा आरोप केला होता. या सर्व पार्श्वभूमीवर ठाकरे आणि भाजप पुन्हा कधी एकत्र येतील का? याबाबत अद्यापही चर्चा घडून येतात. यावर आता ठाकरे यांनी याबाबत एक महत्त्वपूर्ण विधान केले आहे. (Latest Marathi News)

उद्धव ठाकरे म्हणाले, "मी भाजपशी पॅचअप करू शकलो असतो, पण ते माझ्या नीतिमत्तेत बसत नाही.ज्यांनी आपल्याला 2014 पासून फसवलं. मातोश्रीमध्ये बंद दाराआड ठरलेला शब्द त्यांनी फिरवला, अशा लोकांसोबत कसे जाणार? मी महाराष्ट्राचा मुख्यमंत्री होतो. माझ्या आमदारांना मी डांबून ठेवू शकत होतो, पण जे मनाने फुटले होते त्यांना डांबून काय करणार होतो ? त्यांना मी काय कमी केलं ?' असा सवाल ही ठाकरेंनी केला.

'शिवसेनेत इतकी वर्षे घालवलेले जुने निष्ठावंत जेव्हा पक्ष सोडून जातात त्याचे वाईट वाटते. तुमच्या पैकी कुणाला जायचे असेल तर खुशाल जाऊ शकता. संकटं येतात, संकटं जातात, अशा वेळीही मी खंबीर आहे. आपण पुन्हा सत्तेत येणारच आहोत. पण सत्ता मिळवण्यात माझा काही स्वार्थ नाही. मला निवडणूकही लढवायची नाही. तुम्ही निवडणूक लढता. निवडून येता. पक्ष-कार्यकर्ते तुम्हाला मोठे करतात आणि मग मोठे झाल्यावर तुम्ही पक्ष सोडून जाता?" असा सवालही उद्धव ठाकरेंनी केला.