Manoj Jarange: सरकारनं अडमुठेपणाची भूमिका घेतली तर आंदोलक....; जरांगेंनी स्पष्टच सांगितलं

Manoj Jarange : मराठा आंदोलक मनोज जरांगे आझाद मैदानात उपोषणाला बसले आहेत. त्यांच्यासोबत लाखोच्या संख्येनं मराठा आंदोलक मुंबईत दाखल झाले आहेत. सकाळी जरांगेंचं बेमुदत उपोषण सुरु झाल्यानंतर शुक्रवारी संध्याकाळी ७ वाजता जरांगे यांनी उपोषणस्थळावरुन पत्रकार परिषद घेत जाहीररित्या आपली भूमिका मांडली. संध्याकाळी ६ वाजताची वेळ संपल्यानंतर सरकरारनं त्यांना उद्यासाठीची वेळ वाढवून दिली आहे. यावर देखील जरांगेंनी आपली भूमिका मांडली तसंच सरकारला एक इशाराही दिला.

जरांगे म्हणाले, "सरकारनं अडमुठेपणाची भूमिका घेऊ नये, अन्यथा आंदोलकही अडमुठेपणानं वागतील. सरकारनं मराठी समाजाच्या पोरांशी वाईट वागू नये. मराठा समाजाची पोरं इथं माज आणि मस्ती घेऊन आलेले नाहीत. आंदोलकांसाठी रस्ते बंद करु नका, अन्यथा तुम्ही सभा घेण्यासाठी आलात तर आम्ही देखील तसंच करु. आम्ही जशास तसं उत्तर देऊ हे मुख्यमंत्र्यांनी लक्षात ठेवावं"

आणखी आठ टप्प्यांत आंदोलक येणार

जसं जसं सरकार या आरक्षणाच्या निर्णयावर विलंब लावणार आहे तसंतसं लोक काम सोडतं सोडतं मुंबईकडं यायला निघणार आहेत. हा पहिला टप्पा पण नाही, असे सात-आठ टप्पे आहेत. कारण आम्हाला माहिती होतं की आम्हाला मुंबईला त्रास देणार आहेत. त्यामुळं आम्ही थोडे थोडे आलो आहोत. तुम्हाला आणखी पुढे पुढे दिसेल. मुख्यमंत्र्यांची इच्छा पुरी होणार. तुम्हाला मुंबईच्या कापऱ्या कोपऱ्यात मराठ्यांची पोरं दिसतील.

तसंच महाराष्ट्रातही कोपऱ्या कोपऱ्यात पोरं दिसतील. तुम्हाला जे अपेक्षित आहे ते होणार. पण आरक्षण आम्ही घेणार. पण आम्ही कायद्याचा आणि शांततेचा मार्ग सोडणार नाही. तुम्ही मला जेलात टाका मी जेलात जाणार, तिथून उपोषण करणार पण सोडणार नाही. तुम्ही गोळ्या घातल्या तरी मी झेलणार आहे. तुमची जी तयारी असेल त्याला सामोरं जाण्याची माझी तयारी आहे. पण सगळ्या मागण्यांची अंमलबजावणी केल्याशिवाय मी हटत नाही, अशा शब्दांत मनोज जरांगे यांनी आपली भूमिका यावेळी स्पष्ट केली.