पोलिसांनी कारवाईची पावलं उचलताच सोमय्या पिता-पुत्र नॉट रिचेबल

मुंबई: भाजपचे नेते किरीट सोमय्या (Kirit Somaiya) आणि त्यांचे पुत्र नील सोमय्या (Neil Somaiya) यांना मुंबईतील ट्रॉम्बे पोलिसांनी (Trombay Police Station) समन्स बजावले होते. तसेच, आज 11 वाजता त्यांना हजर राहण्याचे आदेश देण्यात आले होते. समन्स बजावले त्यावेळी किरीट सोमय्या घरात नव्हते. त्यानंतर आता दोन्ही पिता पुत्र नॉट रिचेबल असल्याची माहिती समोर आली आहे.

तीन-चार दिवसांपूर्वी शिवसेना खासदार संजय राऊत (Sanjay Raut) यांनी सेव्ह विक्रांत प्रकरणी गंभीर आरोप केले होते. भारतीय नौदलाची (Indian Navy) विमानवाहू युद्धनौका 'INS विक्रांत' भंगारात न जाता तिचे संग्रहालय व्हावे यासाठी २०१३ मध्ये किरीट सोमय्यांनी 58 कोटी रुपये गोळा केले. मात्र, हा निधी राज्यपाल कार्यालयात जमाच झाला नाही, सोमय्यांनी तो त्यांच्या व्यवसायासाठी वापरला, असा आरोप संजय राऊत यांनी केला होता. याच प्रकरणी किरीट सोमय्या आणि नील सोमय्यांना ट्रॉम्बे पोलिसांनी समन्स बजावले आहेत.

किरीट सोमय्या आणि त्यांचे पुत्र नील सोमय्या यांच्यावर ट्रॉम्बे पोलिसांनी फसवणुकीचा गुन्हा दाखल केला आहे. माजी सैनिक बबन भोसले (Former soldier Baban Bhosle) यांनी शुक्रवारी (८ एप्रिल) रात्री उशिरा ट्रॉम्बे पोलीस ठाण्यात ही तक्रार दाखल केली. तसेच, गुरुवारी संजय राऊत यांचे भाऊ आमदार सुनील राऊत यांनी भोसले आणि इतर शिवसेना पदाधिकारी यांच्यासह अप्पर पोलीस आयुक्त संजय दराडे यांची भेट घेतली. त्यानंतर भोसले यांनी दिलेल्या तक्रारीवरून पोलिसांनी सोमय्या पिता पुत्राविरोधात हा गुन्हा दाखल केला आहे.

दरम्यान, संजय राऊतांनी केलेले आरोप किरीट सोमय्यांनी खोडून काढले आहेत.माझ्यावर गुन्हा दाखल केला आहे, पण त्याबाबतचे पुरावे द्यावे, असे सोमय्यांनी माध्यमांना सांगितले आहे. ''आयएनएस विक्रांतसाठी केवळ 35 मिनिटंच निधी गोळा केला. एवढ्या वेळात मी असे किती पैसे गोळा करु शकतो. 10 डिसेंबर 2013 रोजी प्रतिकात्मक कार्यक्रम केला होता.'' तर ''निधी जमा करा, मग मी पुरावे देतो,'' असे राऊतांनी म्हटलं आहे.