Maratha Reservation vs Obc Reservation :
मनोज जरांगे-पाटील यांच्या मागण्या मान्य करणारी अधिसूचना मुख्यमंत्री एकनाथ शिंदे यांनी काढली. त्यानंतर मराठा आणि ओबीसीतील वाद आणखी वाढला आहे. मंत्री छगन भुजबळ यांनी सरकारला घरचा अहेर देत हा निर्णय मान्य नसल्याचे खडसावून सांगितले. मात्र आता त्यांना ओबीसी नेते आणि विरोधी पक्षनेते विजय वडेट्टीवार यांनीही समर्थन दर्शवले आहे. त्यामुळे राज्यात पुन्हा दोन समाजात लढा सुरू झाला आहे.
मंत्री छगन भुजबळ यांनी सरकार विरोधात आवाज उठवला आहे. ओबीसी आरक्षणाला धक्का लागता कामा नये, अशी भावना भुजबळांनी व्यक्त केली आहे. या सगळ्यात आता राज्याचे ओबीसी नेते एकवटले आहेत. केवळ सरकारमधील नाही तर विरोधातले नेतेही एकवटले आहेत. Chhagan Bhujbal यांनी जी भूमिका घेतली आहे, त्या भूमिकेला विरोधी पक्षनेते विजय वडेट्टीवार यांनी पाठिंबा दिला आहे.
विजय वडेट्टीवार यांनी आज त्यांच्या शासकीय निवासस्थानी ओबीसी नेत्यांची बैठक बोलावली होती. त्या बैठकीत त्यांनी विविध विषयांवर ठराव केला. छगन भुजबळ यांना पाठिंबा दर्शवत पुढील रणनीती आखणीला सुरुवात करू, अशी ग्वाही त्यांनी दिली. 5 तारखेपासून राज्यातील सर्व ओबीसी नेते सत्तेतील आणि विरोधातील नेते राज्यभर देवदेवतांचे आशीर्वाद घेत दौरे करणार आहेत. हे दौरे पूर्ण झाल्यावर 20 तारखेला छत्रपती संभाजीनगरमध्ये मोठा मेळावा आयोजिण्यात आला आहे. या मेळाव्यासाठी भुजबळांनाही निमंत्रित करण्यात आले आहे. त्यामुळे पुन्हा एकदा राज्यात ओबीसी एल्गार दिसणार आहे.
'हातात पेन आणि कागद घेऊन तयार राहा'
राज्य सरकारने 16 तारखेपर्यंत हरकती मागवल्या आहेत. ज्यांना हरकत असेल त्या ओबीसी समाजातील लोकांनी हरकती नोंदवायच्या आहेत. या पार्श्वभूमीवर विरोधी पक्षनेते विजय वडेट्टीवार यांनी सर्व ओबीसी बांधवांना आवाहन केले. 16 तारखेपर्यंत हातात पेन आणि कागद घेऊन तयार राहा आणि मोठ्या संख्येने हरकती नोंदवा. आता वेळ आली आहे ओबीसी बांधवांना एकत्र येण्याची आणि लढण्याची, असे वडेट्टीवार म्हणाले.
(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)
'काही मंत्री सत्तेसाठी शेपूट आत घालून बसलेले'
राज्य सरकारने मराठा समाजासाठी काढलेल्या अधिसूचनेविरोधात ओबीसी नेते एकवटले आहेत. भुजबळही आक्रमक झाले आहेत. मात्र राज्य मंत्रिमंडळातील काही मंत्री असेदेखील आहेत जे हा अन्याय सहन करीत आहेत आणि शेपूट आत घालून बसले आहेत, अशी टीका वडेट्टीवार यांनी केली. या मंत्र्यांना केवळ सत्तेशी मतलब आहे. सत्तेसाठी अन्यायही ते सहन करतील, असा टोला विजय वडेट्टीवार यांनी लगावला.
'आमच्या अंगावरचे कपडे काढले'
मराठा समाजासाठी आरक्षणाची अधिसूचना काढून ओबीसी समाजाच्या अंगावरचे कपडे राज्य सरकारने काढलेत. यामुळे ओबीसी समाजाला रस्त्यावर येण्याची वेळ आली आहे. ओबीसी समाजाकडे दुर्लक्ष करीत सरकारने आमच्यावर अन्याय केला, असा आरोप त्यांनी केला आहे. मुख्यमंत्री आमचे नाही आणि दोन्ही उपमुख्यमंत्रीही आमचे नाहीत. त्यामुळे आम्ही आता रस्त्यावर येणार, अशी खंतही विजय वडेट्टीवार यांनी व्यक्त केली.
edited by sachin fulpagare
R...
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.