Navi Mumbai: एकनाथ शिंदेंच्या निर्णयाला गणेश नाईकांचा विरोध; 14 गावांचे भवितव्य पुन्हा टांगणीला

Dombivli, 11 March 2025: वनमंत्री गणेश नाईक सध्या त्यांच्या जनता दरबारामुळे चर्चेत आहेत. शिवसेनेच्या बालेकिल्ल्यात त्यांनी जनता दरबार घेऊन उपमुख्यमंत्री एकनाथ शिंदे यांच्या नेतृत्वाला थेट आव्हान दिले आहे. त्यानंतर पुन्हा ते चर्चेत आले आहेत याला निमित्त आहे त्यांनी मुख्यमंत्री देवेंद्र फडणवीस यांना लिहिलेलं पत्र.

लोकसभा निवडणुकीत नवी मुंबई महापालिकेतून वगळलेली 14 गावे पुन्हा महापालिकेत समाविष्ट करण्याचा निर्णय घेण्यात आला होता. या निर्णयाच्या निर्णयाच्या विरोधात आता वनमंत्री गणेश नाईक यांनी दंड थोपडले आहे. या गावांच्या समावेशाला विरोध केला आहे. याबाबत नाईक यांनी मुख्यमंत्री देवेंद्र फडणवीस यांना पत्र पाठवले आहे. नाईकांच्या पत्रामुळे 14 गावांचे भवितव्यांचे काय असा प्रश्न या गावातील नागरिक विचारत आहेत.

तत्कालिन मुख्यमंत्री एकनाथ शिंदे यांनी लोकसभा निवडणुकांची आचारसंहिता लागू होण्यापुर्वी शासन निर्णय काढून या गावाबाबतची ही मागणी पुर्ण केली. आता कल्याण ग्रामीण विधानसभा मतदारसंघामधील १४ गावे नवी मुंबई महापालिका हद्दीतून वगळावित, असे पत्र नाईक यांनी मुख्यमंत्र्यांना दिल्याने राजकीय वर्तुळात अनेकांच्या भुवया उंचावल्या आहेत. या गावांच्या विकासाचा भार नवी मुंबईकर करदात्यांनी का सोसावा, असा सवाल नाईकांनी पत्रात उपस्थित केला आहे.

नवी मुंबई महापालिकेवर 14 गावांच्या समावेशामुळे सहा हजार कोटी रुपयांच्या आर्थिक भार पडणार असल्याचे नाईक यांचे फडणवीस यांना पाठवलेल्या पत्रात म्हटलं आहे. एकेकाळी वाढीव मालमत्ता कराच्या प्रश्नावर नवी मुंबई महापालिकेतून बाहेर पडल्याने ही गावे समस्यांच्या गर्तेतत सापडली आहेत. यातून बोध घेऊन ग्रामस्थांनी आमच्या गावांचा पुन्हा नवी मुंबई महापालिकेत समावेश करावा अशी मागणी लावून धरली होती.

ही आहेत ती 14 गावे...

नावाळी, वाकळण, बाम्मली,दहिसर, मोकाशी, वालिवली, पिंपरी, निघू,नारीवली, भंडार्ली, उत्तर शीव, बाळे, नागांव, गोठेघर अशी गावांची नावे आहेत.