मलिक म्हणाले, चंद्रकांत पाटलांच्या खिशात काय ते समोर आणायचंय!

पुणे : भारतीय जनता पक्षाचे (BJP) प्रदेशाध्यक्ष चंद्रकांत पाटील (Chandrakant Patil) यांनी नवाब मलिक (Nawab Malik) यांच्यासारखे नेते आपल्या खिशात ठेवतो अस वक्तव्य केले होते. यावर आता राष्ट्रवादी कॅाग्रेसचे प्रवक्ते व अल्पसंख्याक मंत्री मलिक यांनी त्यांच्या टीकेला प्रत्युत्तर दिले आहे. "चंद्रकांत पाटील मला कधी खिशात टाकताय याची वाट पाहतोय, मग मी त्यांच्या खिशात काय काय आहे हे जनतेसमोर आणणार आहे," असे ट्वीट करत त्यासोबत चंद्रकांत पाटलांचा व्हिडीओ सुद्धा टाकला आहे.

मलिक म्हणाले, "भाजप प्रदेशाध्यक्ष चंद्रकांत पाटील सांगत आहेत मी नवाब मलिक यांना खिशात ठेवतो. त्यांचा खिसा इतका मोठा आहे हे मला माहीत नाही. मी वाट बघतोय ते कधी त्यांच्या खिशात टाकत आहेत. मी त्यांच्या खिशात काय काय आहे हे जनतेसमोर आणणार आहे त्यासाठी चंद्रकांतजी मला तुमच्या खिशात टाका." असा खोचक सवाल त्यांनी पाटील यांना विचारला आहे.

मलिक काय म्हटले होते?

भाजपचे मोठे नेते, व त्यांच्या जवळचे लोक एनसीबीच्या (NCB) कार्यालयात जातात. ते एनसीबी अधिकाऱ्यांना भेटतात. काही भाजपाचे नेत्यांचे राईट हँड समीर वानखेडेंना भेटत आहेत, हे मी जबाबदारीने सांगतोय. या हालचाली वाढल्या आहेत. पोपट पिंजऱ्यात गेला तर, आणखी अनेक गुपिते बाहेर येतील म्हणून भाजपाचे लोक घाबरायला लागले आहेत. हिवाळी अधिवेशनात मोठमोठे नावे समोर येणार असल्याचा दावाही मलिक यांनी केला आहे.

के. पी. गोसावी, भाजपाचा एक नेता, त्याची पत्नी एका खासगी कंपनीत संचालक आहेत. विधानभवनाच्या पटलावर मी हे सर्व ठेवणार असल्याचे मलिक म्हणाले होते. मलिक यांच्या टीकेवर देवेंद्र फडणवीस यांनी राष्ट्रवादी काँग्रेसचा पोपट रोज बोलत असल्याची खोचक टीका मलिकांवर केली होती.

हेही वाचा : किरण गोसावीविरोधात पुण्यात तिसरा गुन्हा दाखल

आर्यन खान ड्रग्ज प्रकरणातील मुख्य साक्षीदार किरण गोसावी याच्या विरोधात आता पुण्यात तिसरा गुन्हा दाखल झाला आहे. पुण्यातील वानवडी भागात हा गुन्हा दाखल करण्यात आला आहे. प्रकाश माणिकराव वाघमारे असे फिर्यादी तरुणाचे नाव असून आरोपी किरण गोसावी याने प्रकाशकडून परदेशात नोकरी लावण्यासाठी एक लाख 53 हजार रुपये उकळल्याची माहिती समोर आली आहे.

पोलीसांनी दिलेल्या माहितीनुसार, २०१८ ते २०२१ या काळातील घटना उघडकीस आली आहे. पुणे- सोलापूर रस्त्यावरील क्रोम मॉल चौक परिसरातील मित्रांना मलेशियात मोठ्या पगाराची नोकरी लावण्याचे आमिष दाखविले. तक्रारदारांना त्यांनी ५५ हजार रुपये पगार मिळण्याचे आश्वासन दिले. त्यासाठी त्याने त्यांच्यासोबत इतरांनाही याची माहिती देऊन त्यांचा विश्वास संपादन केला होता.

तसेच नोकरीची प्रक्रिया पुर्ण करण्यासाठी म्हणजे व्हीजा, हॉटेल बुकिंग आणि इतर सुविधा उपलब्ध करुन देण्याच्या बहाण्याने गोसावीने तक्रारदाराकडून पहिल्यांदा ५५ हजार आणि त्यानंतर ९० हजार असे एकूण १ लाख ४५ हजार रुपये घेतले. त्यानंतर अनेकदा तक्रारदाराने अनेकदा विचारुनही गोसावीने टाळाटाळ केली आणि नोकरीही दिली नाही. त्यामुळे तक्रारदारने एकतर परदेशात जाण्याची व्यवस्था करावी किंवा पैसे परत करावेत, यासाठी ऑफिसात गेले असता गोसावीने पिस्तूलाचा धाक दाखवून त्यांना धमकावले. धक्कादायक म्हणजे किरण गोसावीने पुण्यातील अनेक तरुणांना फसवल्याच्या घटना आता समोर येऊ लागल्या आहेत.

यापुर्वीही आरोपी किरण गोसावी विरुद्ध ठाणे, कळवा, अंधेरी, पालघर अशा अनेक पोलीस ठाण्यात फसवणूकीचे गुन्हे दाखल करण्यात आले आहेत. मुंबईतील क्रुझ पार्टीत आर्यन खानला अटक केल्यानंतर गोसावीने आर्यन खानसोबत काढलेल्या सेल्फीमुळे गोसावी प्रकाश झोतात आला. त्यानंतर पुण्यासह राज्यभरात त्याच्याविरोधात फसवणूकीचे गुन्हे दाखल करण्यात आले होते. दरम्यान दोन दिवसांपुर्वी आर्यन खान ड्रग्ज प्रकरणात अमली एनसीबीचा मुख्य साक्षीदार किरण गोसावीला पुणे पोलिसांच्या खंडणीविरोधी पथकाने गुरुवारी अटक केली.