Nawab Malik Support Sharad Pawar : नवाब मलिकांनी केला पत्ता उघड; शरद पवारांना दिला पाठिंबा

Mumbai News : गेल्या दीड वर्षांपासून तुरुगांत असणारे राष्ट्रवादी काँग्रेसचे ज्येष्ठ नेते नवाब मलिकांना वैद्यकीय कारणास्तवर दोन महिन्यांसाठी जामीन मंजूर झाला आहे. दरम्यान, राष्ट्रवादी काँग्रेसमध्ये पडलेल्या फुटीमुळे मलिक उपमुख्यमंत्री अजित पवार की ज्येष्ठ नेते शरद पवार यापैकी कुणाला पाठिंबा देणार याकडे राजकीय वर्तुळाचे लक्ष लागले होते. अखेर मलिकांनी आपला पत्ता उघड करत शरद पवारांच्या मागे उभे राहणार असल्याची भूमिका घेतल्याची माहिती मिळत आहे. (Latest Political News)

शरद पवारांचे कट्टर समर्थक म्हणून मलिकांची ओळख आहे. काही दिवसांपूर्वी मलिकांना सर्वोच्च न्यायालयाने प्रकृती अस्वास्थतेमुळे सशर्त दोन महिन्यांसाठी जामीन मंजूर केला आहे. तुरुंगातून बाहेर पडताच त्यांचे अजित पवार गटासह पवारांच्या राष्ट्रवादीनेही जंगी स्वागत केले. दरम्यान, मलिकांसाठी त्यांच्या मुलीने उपमुख्यमंत्री पवारांची भेटही घेतली होती. त्यामुळे मलिकांच्या भूमिकेकडे सर्वांचे लक्ष लागले होते.

नवाब मलिक तुरुंगात असताना राष्ट्रवादीत फूट पडून राज्यातील राजकीय स्थिती बदलली. या बदलेल्या स्थितीत छगन भुजबळ, दिलीप वळसे पाटील, हसन मुश्रीफ आदी पवारांचे निकटवर्तीय शिलेदारांनी अजित पवारांची पाठराखण केली. या पार्श्वभूमीवर तुरुंगातून बाहेर येताच मलिक अजित पवार की शरद पवार यापैकी कुणाला पाठिंबा देणार, याचीच चर्चा रंगली होती. आता त्यांनी शरद पवारांना पाठिंबा दिल्याचे सूत्रांची माहिती आहे.

दरम्यान, शरद पवारांनी माजी गृहमंत्री अनिल देशमुख, नवाब मलिक हे ईडीपुढे झुकले नाहीत, तर परिस्थितीला सामोरे गेल्याचे वारंवार सांगितले आहे. कोल्हापूर येथेही पवारांनी त्यांचे नाव घेत मंत्री हसन मुश्रीफांवर जोरदार टीका केली. अशातच मलिकांनी आपला शरद पवारांना पाठिंबा असल्याचेही जाहीर केले. त्यामुळे अजित पवार गटाकडून नवाब मलिक यांची मुंबई राष्ट्रवादी अध्यक्ष पदावरून मुक्तता केली. आता या पदावर लवकरच भुजबळ समर्थक शिवाजीराव नलावडे यांची नियुक्ती होणार असल्याचे बोलले जात आहे.

(Edited by Sunil Dhumal)