एनसीबी'ने साक्षीदारांच्या कोऱ्या कागदावर सह्या घेतल्या!

मुंबई : आर्यन खान ड्रग्ज प्रकरणात (Aryan Khan drugs case) दररोज वेगवेगळे खुलासे समोर येत आहेत. ड्रग्ज प्रकरणातील मुख्य साक्षीदार किरण गोसावीचा (Kiran Gosavi) बॉडीगार्ड प्रभाकर साईल यांनी केलेल्या खुलाशांमुळे या प्रकरणाला आता वेगळेच वळण लागले आहे.

आर्यन खान ड्रग्ज प्रकरणातील किरण गोसावीच्या बॉडीगार्डसह इतर साक्षीदारांकडून एनसीबीने कोऱ्या कागदावर स्वाक्षऱ्या करुन घेतल्या, अशा आशयाचे ट्विट करत शिवसेना खासदार संजय राऊत यांनी मोठा गौप्यस्फोट केला आहे. याचवेळी त्यांनी प्रभाकर यांनी काढलेला एनसीबी कार्यालयातील एक व्हिडीओ देखील शेअर केला आहे.

''आर्यन खान प्रकरणातील साक्षीदारांना NCB ने कोऱ्या कागदावर स्वाक्षरी करायला लावणे धक्कादायक आहे. तसेच मोठ्या रकमेची मागणी करण्यात आल्याचेही वृत्त आहे. या प्रकरणांमुळे महाराष्ट्राची बदनामी झाली असल्याचे मुख्यमंत्री उद्धव ठाकरे यांनी म्हटले आहे. आता सत्य लवकरच समोर येणार.'' असे ट्विट संजय राऊत यांनी केले आहे. या ट्विटसोबतच त्यांनी एक व्हिडीओही जोडला आहे.

या व्हिडीओमध्ये किरण गोसावी आर्यन खानच्या शेजारी बसल्याचे दिसत आहे. गोसावीने आर्यनला आपल्या मोबाईलमध्ये काहीतरी बोलण्यास सांगितल्याचे दिसत आहे. गोसावीचा बॉडीगार्ड प्रभाकर साईलने एनसीबी कार्यालयात चोरुन हा व्हिडीओ काढल्याचे त्याने एका व्हिडीओत सांगितले. याशिवाय प्रभाकर यांनी एका व्हिडीओद्वारे मोठा खुलासाही केला आहे.

प्रभाकर यांनी दिलेल्या माहितीनुसार, किरण गोसावी, मनिष भानुशाली आणि प्रभाकर साईल हे लोक होतो. क्रुझवर कारवाई दरम्यान किरण गोसावी, वानखेडे आणि त्यांचे सहकारी होते. आर्यन आणि इतरांना एनसीबी कार्यालयात आणले. तेव्हा पंचाचा साक्षीदार म्हणून प्रभाकर यांनाही सही करायला एनसीबी कार्यालयात बोलावण्यात आले. साळेकर नावाच्या एनसीबी अधिकाऱ्याने त्यांच्यासमोर कोरा पेपर ठेवत सह्या करायला लावल्या. पण कोऱ्या पेपरवर कश्या सह्या करू, असा प्रश्न त्यांनी गोसावींना विचारला. त्यावेळी समीर वानखेडे यांनी त्यांना, टकाय नाही होत तू कर सह्या,' असे म्हणाले. त्यावेळी त्यांनी ९-१० कोऱ्या पेपरवर सह्या केल्या. त्यांचं आधारकार्ड वानखेडेंना व्हॉटसअप केले. पंच म्हणून जेव्हा एनसीबीने सह्या घेतल्या त्यावळी पेपर पूर्ण ब्लॅंक असल्याचं प्रभाकर साईल यांनी सांगितले.