Eknath Shinde Group : शिंदे गटाची डोकेदुखी वाढणार; मुंबईतील पदाधिकाऱ्यांनी दिले राजीनामे

Mumbai Politic's : मुख्यमंत्री एकनाथ शिंदे यांच्या गटातही आता नाराजी आणि रुसवे फुगवे सुरू झाल आहेत. त्यातूनच मुंबईतील काही पदाधिकाऱ्यांनी राजीनामे दिले असल्याचे पुढे आले आहे. आता मुख्यमंत्री शिंदे यावर कसा तोडगा काढतात, हे पाहणे महत्वाचे आहे. (Office bearers of the Shinde group in Mumbai submitted their resignations)

मुंबईतील मालाड, कांदिवली, चारकोप या भागातील शिंदे (Eknath shinde) गटाच्या शिवसेनेतील (Shivsena)पदाधिकाऱ्यांनी हे पाऊल उचलेले आहे. आगामी काळात मुंबई महापालिका व इतर निवडणुका होण्याची शक्यता वर्तविण्यात येत आहे. त्यातच पक्षातील हे रुसवे फुगवे आणि नाराजी शिंदे गटाला परवडणारी नाही. त्यामुळे पदाधिकाऱ्यांची समजूत काढण्याचा प्रयत्न शिंदे गटाकडून होण्याची शक्यता आहे.

माजी मंत्री रामदास कदम यांचे पुत्र सिद्धेश कदम यांच्याकडून कार्यकर्त्यांना त्रास दिला जात असल्याचा आरोप या पदाधिकाऱ्यांनी राजीनामे देताना केला आहे. या पदाधिकाऱ्यांनी मुख्यमंत्री एकनाथ शिंदे यांच्याकडेच हे राजीनामे पाठविले आहेत, त्यामुळे मुख्यमंत्री या वादावर काय निर्णय घेतात,याकडे कार्यकर्त्यांचे लक्ष आहे.

यासंदर्भात शिंदे गटाच्या शिवसेनेच्या मालाड विभागाच्या संघटकाने सांगितले की, आम्ही मालाडमध्ये शिवसेना पक्षवाढीचे काम सुरुवातीपासून करत आहे. पण सध्या मालाड, कांदिवली आणि चारकोप विभागात जे प्रकार सुरू आहेत. पदाधिकाऱ्यांना पदावरून कारण न देता काढले जात आहे. त्यामुळे पक्षातील लोक संतापले आहेत. त्यामुळे आम्ही आमच्या पदाचे राजीनामे मुख्यमंत्री शिंदे यांच्याकडे दिले आहेत.

दरम्यान, लोकसभेची निवडणूक तोंडावर येऊन ठेपल्याने मुंबईतच पक्षामध्ये मतभेद उफाळल्याने शिंदे गटाची डोकेदुखी वाढण्याची चिन्हे आहेत. एकीकडे राज्यात अपात्रतेसंदर्भातील सुनावणी लवकरच सुरू होणार आहे. दुसरीकडे पक्षात स्थानिक नेत्यांमध्ये वर्चस्वाची लढाई सुरू आहे, त्यामुळे मुख्यमंत्री यावर कसा तोडगा काढतात, हे बघावे लागणार आहे.