आमच्यावर आरोप करताहेत..तुमच्याकडेही चार बोट आहेत ; गृहराज्यमंत्र्यांचा इशारा

मुंबई : ''भाजपचे नेते आणि आमदार गिरीश महाजन यांना मोक्‍काच्या खोट्या गुन्ह्यात अडकविण्यासाठी सरकारी वकील प्रवीण चव्हाण यांनी षडयंत्र रचले. खोटे पुरावे तयार केले. इतकेच नाही तर त्‍यांच्या टार्गेटवर मी स्‍वतः सुधीर मुनगंटीवार यांच्यासह भाजपतील इतर प्रमुख नेते होते,'' असा खळबळजनक आरोप विरोधी पक्षनेते देवेंद्र फडणवीस (Devendra Fadnavis) यांनी मंगळवारी विधानसभेत केला. फडणवीसांनी याबाबतचे पुरावे सादर केले आहेत.

फडणवीसांच्या आरोपावर गृहराज्यमंत्री सतेज पाटील (Satej Patil) म्हणाले, ''तुम्ही जर एक बोट समोरच्यावर दाखवत असाल तर तुमच्याकडेही चार बोट आहेत हे विसरून चालणार नाही, कुणावरही असे आरोप करता येत नाहीत, देवेंद्र फडणवीस यांनी विधानसभेत जे आरोप केले आहेत. त्याची सत्यता पडताळली जाईल,'' ते साम टिव्हीशी बोलत होते.

''आम्हीही विरोधात होतो त्यावेळी ही आम्ही लेखी आणि वेगवेगळ्या प्रकारचे पुरावे सादर केले आहेत. या गोष्टीची सत्यता पडताळली जाईल. मग गृहमंत्री उत्तर देतील. एक मंत्री म्हणून मी व्यवस्थित माहिती घेऊन विधानभवनात उत्तर देईन,'' असे सतेज पाटील म्हणाले.

सतेज पाटील म्हणाले, ''वेगवेगळ्या नेत्यांची नावे टाकून आरोप यापूर्वीही आरोप झालेले आहे. बोट दाखवताना हाताची चार बोटं आपल्याकडे आहेत हे विसरू नये, विरोधापक्ष नेते म्हणून त्यांनी सांगितलेल्या माहितीची दखल घेतली जाईल,''

देवेंद्र फडणवीस (Devendra Fadnavis) यांनी मंगळवारी (८ मार्च) थेट विधानसभेतच एक स्टिंग ऑपरेशन सादर केलं. यामध्ये त्यांनी सरकारी वकिल प्रवीण चव्हाण (Pravin Chavan)यांचं संपूर्ण स्टिंग ऑपरेशन केलं आहे.

राज्य सरकार आणि विशेष सरकारी वकील मिळून विरोधकांना संपवण्याचं षडयंत्र आखत असल्याचा गंभीर आरोप माजी मुख्यमंत्री आणि विरोधी पक्षनेते देवेंद्र फडणवीस यांनी केला आहे. फडणवीसांच्या या गंभीर आरोपांबाबत प्रवीण चव्हाण यांनी प्रतिक्रिया दिली आहे. ''व्हिडीओमधील फेरफार आज ना उद्या बाहेर येईल,'' असं सांगत चव्हाण यांनी फडणवीसांचे आरोप फेटाळले आहेत.