Uddhav Thackeray : "तुम्हीच पक्षासोबत गद्दारी केली..."; राज ठाकरेंच्या 'त्या' टीकेला उद्धव ठाकरेंचं प्रत्युत्तर

Mumbai News, 19 Nov : महाराष्ट्र नवनिर्माण सेनेचे अध्यक्ष राज ठाकरे हे आपल्या भाषणातून उद्धव बाळासाहेब ठाकरे पक्षाचे प्रमुख उद्धव ठाकरे (Uddhav Thackeray) यांच्यावर सतत टीका करत आहेत. अशातच काल शिवडीमधील प्रचाराच्या शेवटच्या सभेतूनही त्यांनी उद्धव ठाकरेंवर हल्लाबोल केला.

या सभेतून त्यांनी उद्धव ठाकरे हेच खरे गद्दार असून त्यांच्यामुळे शिवसेना (Shivsena) फुटल्याचा गंभीर आरोप केला होता. राज ठाकरेंच्या याच टीकेला आता उद्धव ठाकरेंनी प्रत्युत्तर दिलं आहे. महाविकास आघाडीचे वांद्रे पूर्वमधील उमेदवार वरुण सरदेसाई यांच्या प्रचार सभेत बोलताना उद्धव ठाकरे म्हणाले, "एक पक्ष आहे कोणता तरी, आधी झेंडा वेगळा होता, आता झेंडा बदलला आहे.

त्यानंतर इंजिन इकडे तिकडे झालं. आधी मनसे होतं त्याच आता गुनसे झालं आहे. गुजरात नवनिर्माण सेना, जो महाराष्ट्राचा घात करेल, त्याला गुनसे साथ देणार, हे त्यांनी ठरवलं आहे. काही ध्येय नाही, धोरण नाही, दिशा नाही, काहीही वाटेल ते बोलायचं आजही काहीतरी बोलले आहेत." असं म्हणत त्यांनी राज ठाकरेंच्या (Raj Thackeray) वक्तव्याचा समाचार घेतला.

राज ठाकरे नेमकं काय म्हणाले?

राज ठाकरे म्हणाले, "2019 पासून राज्याच्या राजकारणात आतापर्यंत जे घडलं त्याला केवळ उद्धव ठाकरे (Uddhav Thackeray) हा एकमेव माणूस कारणीभूत आहे. 2019 च्या निवडणुकीत शिवसेना-भाजपला निवडून दिल. शिवेसेना उठली आणि आणि ज्यांच्या विरोधात निवडणूक लढवली, त्यांच्यासोबत जाऊन बसली ती फक्त मुख्यमंत्रिपदाची माळ गळ्यात घालण्यासाठी.

स्वत:च्या स्वार्थासाठी. देशाच्या राजकारणात आतापर्यंत अशी गोष्ट पाहिलीच नाही. राहुल गांधींसोबत हे बसतात कारण स्वत:चा स्वार्थ. एका माणसाने अख्या पक्षाची वाट लावली. निघून गेलेल्या लोकांना हे गद्दार म्हणतात. असे गद्दार तर घरात तिथं बसलाय. ज्याने पक्षाशी गद्दारी केली."