Thane News : शिवसेना शिंदे गटाच्या माजी नगरसेवकाच्या घरात चोरी; रोकडसह 43 लाखांच्या ऐवजावर डल्ला

Thane Crime News :

ठाण्यातील शिंदे गटाचे माजी नगरसेवक भूषण भोईर यांच्याकडे घरातून डीमार्ट पिशवीत आणि हॅन्ड बॅगेत अशी ठेवलेली 16 लाखांच्या रोकडसह एकूण 43 लाख 60 हजारांच्या ऐवजावर चोरट्याने डल्ला मारल्याची बाब समोर आली आहे.

या प्रकरणी कापूरबावडी पोलिसांनी शैलेश नावाच्या तरुणाला अटक केली. त्याने त्या गुन्ह्याची कबुली दिली आहे. तसेच अटकेतील तरुण हा भोईर यांच्या ओळखीचा असून, त्याच्याकडून चोरीला गेलेला मुद्देमाल जप्त करण्यात आल्याची माहिती पोलिसांनी दिली.

माजिवाडा येथील एका गृहसंकुलात राहणारे माजी नगरसेवक भूषण भोईर यांच्या पत्नी सपना भोईर यांनी या प्रकरणी तक्रार दाखल केली आहे. भोईर हे ज्येष्ठ माजी नगरसेवक देवराम भोईर यांचे पुत्र, तर स्थायी समिती माजी सभापती संजय भोईर यांचे भाऊ आहेत. ते शिवसेना शिंदे गटाचे माजी नगरसेवक आहेत.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

तक्रारदार सपना यांना रविवारी एका कार्यक्रमासाठी जायचे होते. त्यासाठी त्यांनी दागिने परिधान करण्याकरिता घरातील कपाट उघडले. त्यावेळी कपाटात त्यांना दागिने आढळून आले नाही. तसेच घरातील रोकडही गायब झाल्याची बाब निदर्शनास आली. ( Thane Politics News )

अशाप्रकारे घरातून 16 लाख रुपयांची रोकड, 15 तोळ्यांचा सोन्याचा हार, 12 तोळे वजनाची सोन्याची कंठी, 13 तोळे वजनाचा शाही हार, सहा तोळे वजनाच्या कानातले सोन्याचे दागिने असा एकूण 43 लाख 60 हजार रुपयांचा ऐवज चोरीस गेल्याचे तक्रारीत नमूद असल्याची माहिती पोलिसांनी दिली.

R