Shiv Sena UBT : तब्बल दीड महिन्यांपासूनची बोलणी फिस्कटली : उद्धव ठाकरेंसोबतची युती तुटली; महापालिका निवडणुकीत दोन्ही पक्ष स्वबळावर

Vasai Virar News : महानगरपालिका निवडणूक जाहीर होताच बहुजन विकास आघाडी आणि शिवसेना उध्दव बाळासाहेब ठाकरे पक्ष यांच्यात सुरू झालेल्या युतीच्या चर्चांना शुक्रवारी (2 डिसेंबर) पूर्णविराम मिळाला. दोन्ही राजकीय पक्षाच्या उमेदवारांनी सर्वच जागांवर स्वतंत्र उमेदवारी अर्ज दाखल केले होते. असे असतानाही अर्ज मागे घेण्याच्या अखेरच्या दिवशीपर्यंत दोन्ही पक्षाच्या वरिष्ठ नेत्यांमध्ये युतीबाबत बोलणी सुरु होती. परंतु अखेर ती फक्त बोलणीच राहिली आहे.

वसई-विरार शहर महापालिका निवडणूक एकत्र लढावी अशी चर्चा बहुजन विकास आघाडी आणि शिवसेना उध्दव बाळासाहेब ठाकरे पक्ष यांच्यात सुरुवातीला झाली होती. यासंदर्भात चर्चा करण्यासाठी पालघर जिल्हा संपर्क प्रमुख विलास पोतनीस, पालघर जिल्हा निवडणूक यंत्रणा प्रमुख अमोल गजानन किर्तीकर यांनी बहुजन विकास आघाडीचे अध्यक्ष, माजी आमदार हितेंद्र ठाकूर यांची विरार येथे भेट घेवून चर्चा केली होती.

नगरपालिका निवडणुकीची प्रक्रिया सुरु असतानाच युतीची चर्चा सुरु झाली होती. बविआ आणि शिवसेनेच्या (Shivsena) वरिष्ठ नेत्यांमध्ये आघाडीचे चर्चासत्र सुरूच होते. मात्र उमेदवारी अर्ज मागे घेण्याच्या दिवशी शिवसेना उबाठाच्या केवळ दोन उमेदवारांनी अर्ज मागे घेतले आहेत. बाकी अर्ज जैसे थे असल्याने, युती झाली नसल्याचे चित्र स्पष्ट झाले आहे, दोन्ही पक्ष आता विरोधात लढणार आहेत.

भाजपला जिल्हाध्यक्षाला बिनविरोध निवडून आणण्यात अपयश

निवडणुकीसाठी प्रभाग 15 अ मधून भाजप (BJP) जिल्हाध्यक्ष प्रज्ञा पाटील यांनी, तसेच हर्षदा मटकर यांनी अपक्ष उमेदवारी अर्ज दाखल केला होता. या व्यतिरिक्त या प्रभागात इतर कोणत्याही राजकीय पक्षाने उमेदवार दिला नव्हता.

त्यामुळे मटकर यांनी अर्ज मागे घेतल्यास प्रज्ञा पाटील बिनविरोध निवडणून येतील अशा चर्चा रंगल्या होत्या. मात्र, या चर्चांना पूर्णविराम मिळाला असून, शुक्रवारी (ता.2) मटकर यांनी अर्ज मागे घेतला नाही. त्यामुळे आता पाटील यांची थेट लढत अपक्ष उमेदवार मटकर यांच्या बरोबर होणार आहे.