Nawab Malik NCP : यास्मिन पाळत प्रकरणात नवाब मलिकांच्या अहवालासाठी न्यायालयाची पोलिसांना नोटीस

Mumbai court on Yasmeen complaint : केंद्रीय महसूल अधिकारी समीर वानखेडे यांची बहीण यास्मिन हिने राष्ट्रवादी काँग्रेसचे नेते नवाब मलिक यांच्याविरुद्ध बदनामी आणि पाळत ठेवल्याचा आरोप आहे.

या आरोपांप्रकरणी केलेल्या तक्रारीसंदर्भात चौकशी अहवाल का सादर केला नाही, अशी विचारणा महानगर दंडाधिकारी न्यायालयाने केली आहे. यासाठी अंबोली पोलिसांना कारणे दाखवा नोटीस बजावली आहे.

अंधेरी न्यायालयात 2021 मध्ये यास्मिन यांनी तक्रार दाखल केली होती. नंतर ती वांद्रे इथल्या न्यायदंडाधिकारी न्यायालयाकडे वर्ग करण्यात आली होती. वानखेडे यांच्या बहिणीने राष्ट्रवादीचे (NCP) नवाब मलिक यांच्याविरुद्ध केलेल्या तक्रारीची जानेवारी महिन्यात न्यायालयाने दखल घेतली होती.

याप्रकरणी फौजदारी प्रक्रिया संहितेच्या (सीआरपीसी) कलम 202अंतर्गत अंबोली पोलिसांना (Police) आरोपांच्या चौकशीचा आदेश देऊन अहवाल सादर करण्याचा आदेश दिला होता; परंतु पोलिसांनी अद्याप हा अहवाल सादर केला नाही. त्यामुळे वांद्रे अतिरिक्त मुख्य न्यायदंडाधिकारी आशीष आवारी यांनी पोलिसांना अहवाल सादर का केला नाही, अशी विचारणा करून कारणे दाखवा नोटीस बजावली.

राष्ट्रवादी काँग्रेसचे नेते नवाब मलिक यांनी 'एक्स' आणि विविध वृत्तवाहिन्यांना मुलाखती देताना आपल्याविरुद्ध खोटे, बदनामीकारक आरोप केल्याचा दावा यास्मिन यांनी तक्रारीत केला होता. मलिक यांनी बदनामी केल्याच्या दाव्याचे समर्थन करणाऱ्या व्हिडिओ आणि फोटोही तक्रारीसह जोडल्या आहेत.

या फोटोमध्ये आपण एका अमली पदार्थ विक्रेत्यासह असल्याचा दावा मलिक यांनी केला होता. प्रत्यक्षात ती व्यक्ती अमली पदार्थविक्रेता नसून आणि फोटोशी छेडछाड केल्याचा दावा यास्मिन यांनी केला होता. याप्रकरणी मलिक यांच्याविरोधात आपण पोलिसांत अनेकदा तक्रार दाखल केली; परंतु पोलिसांकडून काहीच कारवाई करण्यात आली नाही. त्यामुळे न्यायालयात धाव घेतल्याचे यास्मिन यांनी तक्रारीत म्हटले होते.