'फर्जंद'चे खेळ वाढविण्यासाठी सरसावले राष्ट्रवादीचे कार्यकर्ते ! 

नाशिक : छत्रपती शिवाजी महाराजांशी संबंधीत 'फर्जंद' हा मराठी चित्रपट दिवसेंदिवस प्रसिध्दीच्या झोतात येत आहे. मात्र दुसऱ्या आठवड्यात मल्टीप्लेक्स चित्रपटगृहांत त्यांचे अपेक्षित खेळ होत नाहीत. हे खेळ वाढविण्यासाठी राष्ट्रवादी काँग्रेसने आंदोलन पुकारले आहे. मोजके खेळ असल्याने नागरीकांना चित्रपट पाहता येत नाहीत. त्यामुळे हे खेळ वाढवावेत अन्यथा आंदोलनाचा इशारा देण्यात आला आहे. 

छत्रपती शिवाजी महाराज आणि शूरवीर कोंडाजी फर्जंद यांच्या जीवनावरील सत्यघटनेवर आधारित 'फर्जंद' चित्रपटाचे सिनेमॅक्‍स मल्टीप्लेक्‍स मधील शो त्वरित वाढविण्यासाठी कार्यकर्त्यांसह शहराध्यक्ष रंजन ठाकरे व सरचिटणीस प्रफुल्ल पाटील यांनी मल्टीप्लेक्‍स चालकांना निवेदन दिले आहे. या चित्रपटासाठी प्रेक्षकांची गर्दी होते आहे. शहरातील मल्टीप्लेक्‍स मध्ये एक किंवा दोन खेळ होतात. त्यामुळे तिकिटे मिळत नाहीत अशा तक्रारी नागरिकांनी केल्या आहेत. 'मल्टीप्लेक्‍समध्ये मराठी चित्रपट प्रदर्शीत होत नाहीत. प्राईम टाइममध्ये दिवसभरात एकच खेळ होतो. त्यामुळे निर्मात्यांचाही तोटा होतो आहे. हा प्रबोधनात्मक चित्रपट असल्याने तो पूर्णवेळ दाखवावा. येत्या दोन दिवसात शो वाढविण्यात यावेत,' अशा मागण्या करुन तीव्र आंदोलनाचा इशाराही देण्यात आला आहे. 

या वेळी रोहन नहिरे, किरण मानके, सचिन बिडकर, नितीन कोरडे, राकेश जाधव, कपिल भावले, अमोल भावले, मयूर खैरनार, संतोष ढमाले, विनोद पाटील, सिद्धार्थ गायकवाड आदी पदाधिकारी उपस्थित होते.