PCMC News : पालिका आयुक्त भाजपचे कार्यकर्ते असल्याप्रमाणे वागतात; राष्ट्रवादीचा हल्लाबोल

Pimpri-Chinchwad NCP : पिंपरी-चिंचवड महापालिकेकडे तीस कोटी रुपयांचा भ्रष्टाचाराचा आरोप झालेली जॅकवेल बांधणी निविदा रद्द करण्याची मागणी राष्ट्रवादी काँग्रेसने केली होती. मात्र, ती धुडकावून आयुक्त तथा प्रशासक शेखर सिंह यांनी ती मंजूर केले. या जॅकवेलचे काम वादग्रस्त गोंडावाना कंपनीला दिले आहे. त्यामुळे राष्ट्रवादी काँग्रेसने मुंबई उच्च न्यायालयात धाव घेतली. शेखर सिंह हे आयुक्त म्हणून नव्हे तर भाजपचे कार्यकर्ते असल्याप्रमाणे वागत आहेत. भाजप नेत्यांच्या दबावाखाली चुकीच्या कामांना आणि भ्रष्टाचाराला ते चालना देतात, असा हल्लाबोल राष्ट्रवादी पक्षाचे शहराध्यक्ष अजित गव्हाणे यांनी केला.

Pimpri-Chinchwad शहरातील पाणीटंचाईचा गैरफायदा घेत भ्रष्टाचार करण्याच्या उद्देशाने काळ्या यादीतील गोंडावाना कंपनीला ‘जॅकवेल’चे काम दिल्याचा आरोप यापूर्वीही अजित गव्हाणे यांनी केला होता. त्यामुळे आता काढलेली निविदा रद्द करण्याची मागणी त्यांनी केली होती. मात्र, ती आयुक्तांनी फेटाळून लावली. त्यामुळे त्यांनी त्याविरोधात न्यायालयात जनहित याचिका दाखल केली. या याचिकेवर २ मे रोजी सुनावणी होणार असल्याची माहिती गव्हाणे यांनी गुरुवारी (ता. २७) दिली.

दरम्यान, दिवंगत आमदार लक्ष्मण जगताप आणि त्यानंतर आता त्यांच्या पत्नी आमदार अश्विनी जगताप (Ashwini Jagtap) यांनीही या जॅकवेल निविदेत गैरव्यवहार झाल्याची लेखी तक्रार केली होती. तसेच काढलेली निविदा रद्द करण्याची मागणीही त्यांनी आयुक्तांकडे केली होती.

याबाबत अजित गव्हाणे (Ajit Gavhane) म्हणाले, "गोंडावाना इंजिनिअरिंग कंपनीने अटी, शर्तीनुसार कागदपत्रे सादर केलेली नाहीत. काळ्या यादीत असल्याची बाबही त्यांनी लपविली. निकृष्ट दर्जाची कामे केल्याचे शेरे या कंपनीवर आहेत. १२० कोटी रुपयांचे जॅकवेलचे काम या कंपनीला १४७ कोटी रुपयांना देण्यात आले. देखभाल दुरुस्तीसाठी २३ कोटी रुपयांचा खर्च निश्चित केला असतानाही त्यासाठी २८ कोटीच्या खर्चाला मान्यता दिली. या अनागोंदी प्रकरणी न्यायालयात जनहित याचिका दाखल केली आहे. त्याद्वारे शहरातील जनतेला न्याय मिळेल आणि भाजपचा आणि आयुक्तांचा भ्रष्टाचारी चेहरा जनतेसमोर उघडा होईल."

(Edited by Sunil Dhumal)