Lok Adalat News : लोकअदालतीत ई-चलानला ‘नो एंट्री’; आर्थिक फसवणुकीची भीती, पोलिसांनी केलं सतर्क

Lok Adalat cases Maharashtra : राज्यभरात येत्या १३ डिसेंबरला लोकअदालतीचे आयोजन करण्यात आले आहे. या लोकअदालतीमध्ये ई-चलान प्रकरणांची तडजोड स्वीकारली जाणार नाही, असे स्पष्ट करण्यात आले आहे. त्याचप्रमाणे लोकअदालतीमध्ये ई-चलान दंडात सवलत मिळणार असल्याचा खोटा प्रचार केला जात असून त्यामाध्यमातून आर्थिक फसवणूक होण्याची भीतीही व्यक्त करण्यात आली आहे.

मुंबईतील वाहतूक शाखेच्या अपर पोलीस महासंचालकांनी याबाबत नागरिकांना सतर्क राहण्याचे आवाहन केले आहे. त्यांनी दिलेल्या माहितीनुसार, २०२१ पासून प्रलंबित ई-चलान प्रकरणांच्या निपटाऱ्यासाठी वाहतूक विभागाकडून महाराष्ट्र राज्य विधी आणि सेवा प्राधिकरणाच्या मंजुरीने प्रयत्न केले जात आहेत. मात्र आगामी लोकअदालतीत वाहतूक विभागाकडून कोणतीही ई-चलान प्रकरणे तडजोडीसाठी ठेवली जाणार नाहीत.

काही यूट्यूब, इंस्टाग्राम तसेच अन्य सामाजिक माध्यमांवर १३ डिसेंबरच्या लोकअदालतीत ई-चलान दंडात सवलत मिळणार असल्याचा खोटा प्रचार केला जात असल्याचेही निदर्शनास आले आहे. अशा अफवांमुळे नागरिकांची आर्थिक फसवणूक होण्याची शक्यता असल्याने पोलीस विभागाने नागरिकांना सतर्कतेचे आवाहन केले आहे.

ई-चलान तडजोड किंवा दंडात सवलत याबाबत सामाजिक माध्यमांवरील अपप्रचारावर विश्वास ठेऊ नये, असे आवाहनही करण्यात आले आहे. कोणत्याही अनधिकृत लिंकद्वारे ई-चलानची रक्कम भरणा करू नये, असा सावधानातेचा इशाराही देण्यात आला आहे.  

जर एखाद्या नागरिकाचे प्रकरण स्थानिक जिल्हा विधी व सेवा प्राधिकरणाने तडजोडीसाठी ठेवले असल्यास, संबंधित न्यायालय किंवा स्थानिक वाहतूक पोलीसांशी थेट संपर्क साधावा, असे पोलीस अधीक्षक (मुख्यालय) सुनील भारव्दाज यांनी स्पष्ट केले आहे.