Maharashtra teachers news : पदोन्नतीसाठी TET बंधनकारक; बदलीसह पदोन्नती अन् समायोजनासाठी लवकरच नवीन नियमावली

Zilla Parishad schools : जिल्हा परिषदेच्या शाळांमधील शिक्षकांच्या बदल्या, पदोन्नती तसेच समायोजनाची प्रक्रिया अजूनही सुरूच आहे. शाळा सुरू होऊन जवळपास महिना उलटला तरी ही प्रक्रिया पूर्ण झालेली नाही. यावर्षीची संचमान्यता २० सप्टेंबरपर्यंत न होता फेब्रुवारीमध्ये मिळाल्याने अतिरिक्त शिक्षकांचे समायोजन वेळेत झाले नाही, असे सरकारकडून सांगितले जात आहे. याअनुषंगाने ग्रामविकास मंत्री जयकुमार गोरे यांनी शुक्रवारी विधानसभेत महत्वाची घोषणा केली.

शाळा सुरू होण्यापूर्वीच शिक्षकांची पदोन्नती, समायोजन आणि बदली प्रक्रिया पूर्ण करण्यासाठी लवकरच नवीन नियमावली तयार करणार असल्याची माहिती मंत्री गोरे यांनी शुक्रवारी विधानसभेत दिली.भाजप आमदार श्रीजया चव्हाण यांनी याबाबत लक्षवेधी उपस्थित केली होती. त्यावर गोरे यांनी ही घोषणा केली.

गोरे यांनी विधानसभेत सांगितले की, अतिरिक्त शिक्षकांचे समायोजन करण्यापूर्वी पदोन्नतीची प्रक्रिया पूर्ण करणे आवश्यक आहे. सर्वोच्च न्यायालयाच्या निर्देशानुसार शिक्षक पदोन्नतीसाठी शिक्षक पात्रता परीक्षा (टीईटी) उत्तीर्ण असणे अनिवार्य आहे.

टीईटी संदर्भातील अनेक प्रकरणे उच्च न्यायालय आणि सर्वोच्च न्यायालयात प्रलंबित असल्याने पदोन्नती आणि त्यानंतरची समायोजन प्रक्रिया विलंबाने होत आहे. यावर्षी संच मान्यता नेहमीप्रमाणे ३० सप्टेंबरपर्यंत न होता फेब्रुवारीमध्ये मिळाल्याने अतिरिक्त शिक्षकांचे समायोजन वेळेत होऊ शकले नाही, असे गोरे यांनी स्पष्ट केले.

सध्या संबंधित जिल्हा परिषदांमध्ये प्रथम मुख्याध्यापक पदासाठी शिक्षकांच्या पदोन्नतीची प्रक्रिया राबविण्यात येत आहे. त्यानंतर अतिरिक्त जागांवर अतिरिक्त शिक्षकांचे समायोजन करण्यात येणार आहे. जिल्हास्तरीय व तालुकास्तरीय अतिरिक्त शिक्षक समायोजनाचे अधिकार १८ मे २०११ च्या शासन निर्णयानुसार मुख्य कार्यकारी अधिकाऱ्यांकडे (सीईओ) आहेत. त्यामुळे संबंधित मुख्य कार्यकारी अधिकाऱ्यांना अतिरिक्त शिक्षकांचे समायोजन लवकरात लवकर करण्याच्या सूचना देण्यात येणार असल्याचेही गोरे यांनी सांगितले.