NCP Sharad Pawar News : राष्ट्रवादी काँग्रेस पार्टी- शरदचंद्र पवार पक्षाची पुण्यात उद्या(शुक्रवार) जाहीर सभा होणार आहे. वडगाव शेरी विधानसभा मतदारसंघांमध्ये होणाऱ्या या सभेमध्ये पुणे महापालिकेतील माजी 10 नगरसेवक पक्षात प्रवेश करणार असल्याचे सांगण्यात येत आहे. माजी आमदार बापू पठारे यांनी गेल्या आठवड्यात राष्ट्रवादी काँग्रेस पार्टी शरद पवार पक्षामध्ये प्रवेश केल्यानंतर या सभेचे नियोजन करण्यात आले आहे. मात्र पुणे आणि परिसरामध्ये सातत्याने होणाऱ्या पावसामुळे ही सभा होणार का याबाबत प्रश्नचिन्ह उपस्थित झाले आहे.
पुण्यामध्ये एकीकडे गणेश विसर्जन मिरवणूक सुरू असताना दुसरीकडे भाजपमध्ये असलेले माजी आमदार बापू पठारे यांनी मुंबई येथील शरद पवार यांच्या निवासस्थानी जाऊन पक्ष प्रवेश केला होता. हा प्रवेश अतिशय घाईगडबडीत झाल्याने यानंतर वडगाव शेरी विधानसभा मतदारसंघात मोठी जाहीर सभा घ्यावी अशी मागणी बापू पठारे यांनी केली होती. त्यानुसार शुक्रवारी राष्ट्रवादी काँग्रेस पार्टी- शरदचंद्र पवार पक्षाचे अध्यक्ष शरद पवार यांच्यासह प्रदेशाध्यक्ष जयंत पाटील, खासदार सुप्रिया सुळे(Supriya Sule), आमदार रोहित पवार यांच्या उपस्थितीमध्ये जंगी सभा होणार आहे.
राष्ट्रवादी काँग्रेस शरद पवार(Sharad Pawar) पक्षाकडून या सभेचं जोरदार नियोजन देखील करण्यात आला आहे. विधानसभा निवडणुकीच्या पार्श्वभूमीवर या सभेद्वारे बापू पठारे शक्तिप्रदर्शन करण्याची शक्यता आहे. यासाठी त्यांनी जोरदार मोर्चे बांधणी सुरू केली असल्याचे देखील समोर आले आहे. वडगाव शेरी विधानसभा मतदारसंघांमध्ये पक्षाची ताकद वाढवण्यासाठी बापू पठारे यांनी 10 माजी नगरसेवकांचा राष्ट्रवादी काँग्रेस शरद पवार पक्षांमध्ये प्रवेश करण्याचा चंग बांधला आहे. या माजी नगरसेवकांमध्ये बहुतांश पठारे यांच्या कुटुंबीयातीलच व्यक्ती आहेत. मात्र त्याशिवाय इतर कोणते मजी नगरसेवक पक्ष प्रवेश करणार याकडे सर्वांचेच लक्ष लागले आहे.
विधानसभा निवडणुकीची आचारसंहिता पुढील काही दिवसांमध्ये लागण्याची शक्यता आहे. त्यापूर्वी पुणे शहरातील वडगाव शेरी विधानसभा मतदारसंघांमध्ये होणाऱ्या या जाहीर सभेच्या माध्यमातून पुणे शहरातील विधानसभा निवडणुकीचा नारळ फोडला जाणार असल्याचं बोललं जात आहे.
दरम्यान गेल्या तीन-चार दिवसांपासून पुणे आणि शहर परिसरामध्ये पावसाची जोरदार बॅटिंग सुरू आहे. हवामान खात्याकडून पुढील दोन दिवसांसाठी रेड अलर्ट देखील देण्यात आला आहे. या पावसामुळे आज होणारी पंतप्रधान नरेंद्र मोदी यांची सभा देखील रद्द करण्यात आली. त्यामुळे आता शरद पवारांच्या पक्षाची उद्याची जाहीर सभा होणार का? याबाबत सोशल मीडिया वर खुमासदार चर्चा रंगताना पाहायला मिळत आहेत. तसेच उद्या सभा होणार का आणि या सभेमध्ये शरद पवार काय बोलणार? याकडे सर्वांचेच लक्ष लागले आहे.
(Edited by - Mayur Ratnaparkhe)
सरकारनामाचे सदस्य व्हा
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.